Balei ki trai shnong kim ioh kam ha NEHU, ther ka NEHUTA ia U VC

Shillong:Ka North Eastern Hills University Teacher Association (NEHUTA) ka kynhun jong ki nonghikai ha skulbah North Eastern Hills University (NEHU), lyngba u nongialam jong ka u Professor Lakhon Kma, u la ong ba kiba bun ki briew kiba trei bad hikai hapoh jong ka skulbah NEHU ki dei beit kiba na shabar jong ka jylla bad kiba dei ruh kiba don ka jingiadei saiñ hima sima bad ka parti ba ioh bat ia u lakam synshar ha nongbah Delhi.

Haba kren sha ki lad pathai khubor u professor Lakhon Kma, u la kynnoh ia U Vice Chancellor ba mynta, ha kaba iadei bad ka jing thung kam ha une u snem ba la dep naduh u nailar haduh u naiwieng, ha kaba u wanrah beit beit ia ki briew kiba la don jingiadei bad ki briew kiba don ha ka parti ba pyniaid ha Delhi, namar bunsien la ïohi ba bun na ki nongtrei ki dei beit ki bym sngewthuh wat ia ka ktien phareng ruh lait noh ki nonghikai, katba ki trai shnong trai muluk kim ioh.
U la iathuh shuh ruh ba dang shitaiew tam dang dep interview ha ka ophis treikam jong u Deputy Register, ym don wat tang u wei ruh u trai shnong bad baroh ki dei lut na shabar, khamtam na kawei ka shnong ba don ka jing sngewjan bad ka parti ba bat ia u lakam synshar ha ka sorkar pdeng.

“Ha ka jingpeit jong ngi ka lah beit ban dei imat ka seng RSS,namar kumno u trai shnong na jylla Meghalaya la dei dkhar, khasi ne Garo uwei ruh ym don ba ioh ban rung kam hangne namar u wanrah beit da ki briew lajong, tip ki nang ne ym nang kine ki briew ym tip ki wanrah beit da ki briew kiba na bar” la ong u professor Lakhon Kma.
Ka dang don shuh ki jingma kiba ap namar ki dang don shibun ki kam non teaching staff kiba dang lait bad kiba u thmu beit ban wanrah da ki briew kiba don ka juh ka jing ngeit, lehse kan don ka por ba kin pynduh noh wat ia ka reservation ruh ban pynrung beit ia ki samla pule tang na kawei ka jingngeit.

U la pynkynmaw ruh ba u la dep ban kren haba iadei bad kane ha kaba u la pynsngew sha u wei u MLA ka parti ba don ha ka liang pyrshah kumjuh ruh sha u General Secretary jong ka parti ba donlang hapoh jong ka sorkar, ha kaba ar kynta tam u la ia shong bad kine ki briew ban batai hynrei ki khlem leh eiei bad kane ka la pynbitar, namar ba bunsien u iohsngew ba kine ki briew ki kren ba ki ieid jaidbynriew bad ka por ka la dawa ba da ki ieid jaidbynriew balei kim rah ia kine ki mat, ka jingieid jaidbynriew khlem da wad ia ki lad ki lynti kumno ban ai kam ia ki briew lajong.

“Ha man la ki jylla ka kam ka bym dei ka kam hikai ki ban ioh kam ki dei beit ki trai ri trai muluk, phin leit ha kino kino ki skulbah ruh la ha Assam University ne kino kino ki skulbah jong ka sorkar pdeng kin dei beit ki trai jylla kiba trei ia kine ki kam, hynrei dei tang ha jylla Meghalaya ba ki nongtrei kan dei beit da ki briew kiba nabar” ong U Proffessor Kma. U la ong ruh ba imat ka la donkam ban wanrah da u paidbah ban dawa na u V.C. jong kane ka skul bah ban kylli ba balei ki trai shnong kim ioh kam ha ka jylla lajong.
“Bunsien ki parti ki jong ngi ki shu pynshong shit bad pynbiej ia u paidbah da ka jingkam jong kiba ki ieid ri ieid jaidbynriew ki dei ban pyni da ka kam ym tang ka ktien bad tuklar ruh ha NEHU ba ki briew jong ngi ki dei ban ioh kam ym tang ki briew ba nabar” ula ong shuh shuh.

Ka kynhun jong ki nonghikai kan phah ruh ia ka shithi jingmudui sha ka ophis jong ka Human Resources Development (HRD) bad sha ka ophis treikam jong ka President india, sha ki dkhot jong ka ïingdorbar thawain Lok Sabha, nongialam jong ka liang pyrshah ha Ïingdorbar Thawaiñ Loksabha,PMO office ban batai lut kaei ka kam sniew ba u la leh naduh ba u la wan hapoh jong kane ka skulbah.
“Ngi la dawa ruh ba u Vice chancellor u dei ban hiar shuki noh ,namar la katto ngi iakhih ngi khlem pan ba un hiar shuki, hynrei mynta ngi la dep ban soi ban dawa hiar shuki noh ha ka jingialang” ong U Proffessor Kma. “Wat la u vice chancellor u la bteng ban shu sngap kuman na ka por sha ka por ngin iai bteng beit khlem sahngeh ban dawa ban resain non bad um don satia ia ka hok ban ialam ia ka skulbah namar u dei u briew u bym don satia ia ka jing shemphang, u wan san snem bad lai snem ka la iaid khlem don satia kaei kaei ba u wanrah lah hiar ka kyrdan jong kane ka skulbah”.

“Lada un ioh shong ha ka shuki sa ar snem ngin sa ïohi ba yn ym don shuh wat tang u wei ruh u trai shnong u ban ioh rungkam ha kane ka skulbah namar u don ia ka agenda ngan wanrah beit da ki briew nangtai kiba don ka jingiashah ia kawei ka seng”. U Professor Kma u la ong ruh ba kumba ki ïohi ba une u briew um don satia ka mon ban trei ban kyntiew ia kane ka skulbah, hynrei u kwah tang ban pyndonkam bakla ia ka pisa jong ka skulbah namar um juh don hangne u leit shang shaei ruh kimn tip bad ka skulbah ka nang hiar nanghiar ha ka por jong une u vice chancellor.