Shillong:Ka Working President jong ka party Congress ka kong Mazel Ampareen Lyngdoh, ka la ong ba ka jingleh kyrkieh jong ki nongialam na ki ar tylli ki jylla, kiba la pyrshang ban pynbeit noh kloi ia u pud u sam hapdeng ka Assam bad Meghalaya kaba la sah kut la bun bun snem ka dei kaba pynkhuslai ia baroh, namar ba ka jylla Meghalaya kam don ei ei ban shim na ka Assam lane ba kan ai eiei sha ka Assam.
Haba kren bad ki lad pathai khubor ha ka sngi ba ar ka kong Lyngdoh ka la ong “Ha kaba ia dei bad ka jingpynbeit ia u pud u sam hapdeng ka jylla Assam bad Meghalaya la mih ruh ki jingdawa ba ki dei ban kynthup lang ia ki nongmihkhmat na ki District Council bad ia ki map ba ka don ha ka ne ka jingiakren ban pynbeit ia u pud u sam hapdeng ka Assam bad Meghalaya”.
Ka la ong ruh “Ka Regional Commitee na ka West Khasi Hill ha ka jingjurip kaba khadduh, hato ka la poi ha kano kano ka rai namar ba haba kane ka Commitee ka ba la pynlong ia ka jingiakynduh bun na ki briew na ka party Congress kiba dei ki dkhot ha ka ne ka Commitee ki la iathuh ba bun na ki mat ym shem la lah ban pynbeit da kane ka committee”.
Ka la bynrap shuh shuh “Haba ka Commitee ka khlem lah ban pynbeit eiei ha ka jingialang bad ki paidbah, balei ka long kaba kyrkieh ban leit ban jurip da ki nongialam ka jylla na baroh ar tylli ki jylla sha kane ka jaka”.
“Nga sngew khia ba kane ka jingkyrkieh ban leit ban jurip ia kine ki jaka kaba khlem kynthup lang ia baroh ka lah ban don kano kano ka jingmut ba sniew, ngam tip la ka sorkar jylla ka la ai por ba biang ne em na ka bynta kito ki ba kam ia kine ki jaka naduh u snem 1972″la ong ka kong Ampareen.
“Ngi la don ha ka sorkar ha ki por ba la dep ha kaba ngi la tip ia ka jingeh jong ka ne ka mat ban pynbeit , ngi tip ba ka kaiphot jong ka Survey of India ka ba la shim ia ka jingai jingmut jong ki Commission ki bapher bapher halor ka mat khappud ka khlem wanrah ia ka jinghun ia ki ba bun ha ka ba na ka liang ka sorkar Assam ka la buh jingkylli ia ka ne ka kaiphot” ka la bynrap.
Ka la buh ia ka jingkylli “Ngam tip balei ki leh kyrkieh ban leit ban ia kynduh ha Langpih mynta ka sngi, ha kaba nga kyrmen ba ha ka ne ka jingialang mynta kin ym shim kano kano ka resolution ka ba kin pdiang namar ba kane kan pynmih ia ka jingdom na ki paidbah”.
“Ha kum kane ka por ba ka jylla ka dang mad jingeh na ka daw ka khlam, ngi kwah ban iohi ia ka sorkar kan pynleit jingmut shuwa ia kiwei kimat la ka dei ha ka ioh ka kot, la ka dei ha ka pule puthi ka ba la shah ktah jur ha kane ka khlam”ka la ong.
Ka congress AR term mynshwa kam shim la leh ei2 IA ka border issues bad wohnia pat da LA mut leh dakiwei. Wow