Balei ka sorkar, ka lap formalin, ia ki dohkha tang shisien ha ka san snem?

Shillong:Ka Khasi Jaintia Fish Whole Seller and Retailer Association ka la buh jingkylli ia ka Sorkar, balei ba lap formalin ha ki dohkha shisien san snem. Kane ka jingbuh jingkylli jong ka Association ka long hadien ba ka Sorkar Jylla lyngba ka Commissioner Food and Safety ka la pynmih hukum ban mana pynpoi ia ki dohkha na shabar Jylla haduh 15 sngi, kaba la sdang naduh ka 8 tarik mynta u bnai Jylliew.

Haba kren sha ki lad pathai khubor, u president ka Association, u Bah Mitchel Wankhar u la pynpaw ka jingsngewkhia ba la khang ban wanrah ia ki dohkha na Andhra Pradesh, watla kitei ki dohkha kidei kiba la dep ban khmih bniah hashwa ban pynpoi sha kane ka Jylla.
U la buh jingkylli balei ka jinglap ia ka formalin ha ki dohkha ka paw tang shisiem san snem, namar kane ka la jia teng ruh ha u snem 2018, bad bynrap ba katkum ka jingkam jong ka Sorkar haduh 40 tylli ki nongmuna la shim ban peit bniah, bad buh biang ka jingkylli hato kine ki nongmuna la shim na ki dohkha ba wan pynpoi beit na Andhra Pradesh ne kiba poi na kiwei ki Jylla ruh.

U la ong ba na ka liang ka Association ka kwah ban shai, bad ka tnat Fisheries bad Health kidei ban phah ka kynhun tohkit ban wad bniah na Andhra Pradesh. U la ong shuh shuh ba lada ka Sorkar ka kwah ban leh ia ki jingpeit bniah lane kino kino ki test kadei ban leh ha Khlieh Ïewduh kaba dei ka jaka ba pynhap ia ki dohkha.
U la ong ban kynnoh ba lap formalin na ki dohkha kiba wan ba Andhra Pradesh ka long ka bym lah ban pdiang namar kan shim por haduh 2 kynta tang ban pynhap ia ki dohkha, bad khamtam ka dohkha kaba kum ki nongkhaïi ki die ha ïew kadei ka dohkha kaba ki bam ruh ialade.

Na ka liang u Bah Wankhar u la ong ruh ba ka seng kan iakynduh ia u Myntri ba dei khmih bad kumjuh ia u Myntri Rangbah ka Jylla halor kane ka kam.
U Bah Mitchel uba dei ruh u executive member ba khmih ia ka kam dohkha ha KHADC, u la iathuh ba ka jingpynpoi dohkha na Andhra Pradesh ha ka shisngi ka long haduh 30 Metric Tonn, ia kaba ka Jylla kam lah ban pynmih na lade haduh mynta. Shuh shuh u la iathuh ba ki dohkha kiba pynpoi na Andhra Pradesh kidei tang 4 jait.

U la la ong ruh ba ka kam khaïi bad die dohkha hapoh ka Jylla kadei kaba la trei tang da ki Khasi, bad lada kheiñ kyllum kumba 15 haduh 20 hajar ngut ki Khasi ki la shah ktah ka pliang ja na kane ka jingkhang ban pynpoi ia ki dohkha na shabar Jylla.
Ka Kong Milda Rynjah kaba dei ka vice president jong ka Association ka la pynpaw ia ka jingeh ba kum ki nongkhaïi ki iakynduh da ka jingpynbna syndet ka Sorkar ban khang die ia ki dohkha kiba wan poi na shabar ka Jylla. Ka la iathuh ba ka jingduhnong ka la poi shaduh klur tyngka bad ong ruh ba mano ban buria ia kane ka jingduh.