Balei ka NEIGHRIMS?

Bah Monarch Shabong

Ka jing ia bit jingpang jong ki nongtrei lane ki nongpang ha NEIGHRIMS, la iohi, ba ka long kaba jur shi katdei. Ngim pat ioh ia ka jingkhein kaba shai, hynrei, la iohi, ba ki doktor, ki la don kiba ioh pang, ki nos nangta sa ki nongpang bad katei ka la dei ban long ka daw, kaba ka tnat jong ka koit ka khiah, ka dei ban pyrkhat jylliew ia kane ka mat, namar ba mynta, ka la sdang ban saphriang sha kiwei pat ki jaka kylleng ka nongbah Shillong bad sha kiwei de ki jaka ba marjan.

Ki la don bun ki jingkren diaw bad kren khnium, da kiba bun halor ka jing pyniaid ia katei ka hospital bad kawei na ki jingshisha, ka long ba ka dorbar shnong Mawkasiang, ka hap ban ai jaka sah ia la ki jong ki nongshong shnong, ba kin shong kyrpang, namar ba katei ka hospital, ka la shu pyllait laitluid ia ka leit ka wan ki nongtrei jongka, hadien ba ki la dep kam.

Ki lah ban don bun ki daw, kiba wan rah ia katei ka jing ia bit jingpang bad na kaei kaba sngewthuh, ka lah ban long na ka riam ka beit jongki lane kita ki riam jong kane ka juk ka PPE, ba kim biang, lane ka bam ka dih bad lehse, sa ka jingtrei bun kynta jongki, ha la ki jong ki kam, kiba lah lehse ban long khyndiat ki jingshisha, kiba ka sorkar Jylla, ka la dei ban iakren kyrkieh bad pynbeit ia ki jingeh kiba don ha katei ka hospital.

Na ka jingtip, kaba lah ban sngewthuh, ka long ba ki nongtrei, kiba don hangtei, kim don ia ki jaka sah kiba biang ha katei ka hospital bad kumta, mar ia kut la ki jong ki kam, ki hap ban leit sha la ki jong ki iing ki sem bad katei ka dei kawei na ki daw, kaba wan rah ia kane ka jing ia bit jingpang hapdeng para ma ki bad nangta, kaba ki ia bit sa sha kiwei pat ki paidbah.

Ka jing ia bit jingpang ha NEIGHRIMS, haba peit, ka dei lyngba uwei u shipai BSF, uba shah sumar ha ka tnat Orthopedic departmet bad uba la khlad noh, ha ki khyndiat sngi ba ladep bad lada ka long kumta, ka pyni, ba ka don ka jing leh synjor ha katei ka tnat bad kaba long ka daw jong ka jingpur ka jingpang sha kiwei ki nongtrei ka hospital bad kaba la sdang ban saphriang sa shabar.

Katei ka mat, ka dei kaba khia shibun eh, namar ka ktah ia ka koit ka khiah jong u paidlang ka Jylla bad ka sorkar Jylla, ka dei ban shim khia mar mar ia katei ka kam, ha shwa ba kan long kaba eh ba ngin teh lakam, ia ka jingpur katei ka jingpang sha kylleng ka ri Khasi.