[ba bteng]
Bah SKN
“Rida Rida, phi wan shane..?”
“Hooid Meiieid, nga mut wan peit ia i Niakha kein..” La jubab ka Rida
“Dang myntan ki ia mih ban leit thied mar bad kito ki Samla shynrang..” La iathuh i Kong Mer.
“O kumta mo…!! Ban dei ba ngam slem mut nga la iakynduh…” La jubab ka Rida
Ka Linda ka bym pat tip ia kaei kaba jia ka la kylli.
“O long i Mei jong phi im shong dukan shuh…?” Ka la peit lyngngoh
“Em im shong shuh namar kane dei ka dukan i Niakha te…” La jubab ka Rida
“Kumno kumta long im ai shuh seh Niakha jong phi ban shong i Mei phi…? I leh aiu pat mynta..?” La buh jingkylli biang ka Linda.
“Em ba i la donkam hi te… I Mei te lah shu shong ha iing..” La jubab sian ka Rida
“Phin leh kumno khun phin ap..?” La kren ieid i Kong Mer
“Ngan ap shiphang …” La jubab ka Rida
“Slem te tharai in dang slem hi namar i dang shu leit te…” La iathuh lem i Kong Mer.
“Ngan ap tang shiphang lada i slem ngan leit noh..” La ong ka Rida
Ki la ia ap hangta haduh shikynta shiteng hynrei ym don ba wan mih mano mano ruh. Baroh ar ngut ki la ia sakhrai ka kjat. Kumta ka Rida kam banse ban phet noh nangta.
“Ni ym lah ap shuh phi Mei ieid, ngin leit noh sa shu iathuh lem mo ba nga wan wad ma nga…” La ong ka Rida
Kumta wut ki ia pynbeit la ki kjat sha la iing la iing.
Haba la poi ha iing ka Rida ka la shet sha ia lade bad ia la ka Kmie. Katba dang ia dih sha, i Kmie jong ka i la kylli
“Pha poi iew ne em…?”
“Em, nga khlem poi nga shu leit ha iing i Linda…” La jubab ka Rida
“Nga shu kylli ioh pha poi namar ba pha la slem…” La ong pat ka Kmie
Watla ka Kmie kam tip ia ka jingshisha hynrei ka mynsiem ka Rida ka la sngew pap hi ha lade namar ba ha ka jingshisha ka leit khnang sha Iew. Hynrei namar kam kwah ban iathuh ka la kun la ka kun ha la mynsiem. Kumta hadien ba la dep dih sha ka la khohreh sa ka shet ka tiew kumba ju long. Ynda la dum ka bneng u Panah u la wan iing. Ka Kmie jong ka, ka la bthah ban shet sha ia u. Ka Rida ruh ka la leh kumba la bthah ka Kmie ka la leh don burom ia u watla kam da sngewtynnat than.
Hadien ba la dep dih sha u Panah u la kylli ia ka
“Rida mynne phi wan sha dukan mo….?” U ap ba kan jubab
Kane ka jingkylli ka la pyn jnang khak ia ka Rida ban jubab.
“Balei phi kylli…?” La phai ktien ka Rida
“O ym long shuh ban shu kylli ruh…?” La ong pat u Panah
“Long balei ym long…?. Tang ba kumta hi kein… Da sngew pher ka rukom kylli jong phi” la jubab ka Rida
Marsien kumta la iohsngew ka Kmie jong ka, ka wan mih hangta bad kem ktien
“Balei…? Nga sngew phi ia kren aiu..?” Ka la kylli sa ma ka
“Em nga shu kylli na i Rida pleng i wan na dukan mo mynne.. Hynrei i kylli kylla pynban balei nga kylli ..” La iathuh u Panah.
Kane ka jingiathuh u Panah ka la pynbitar leb ia ka Kmie jong ka.
“Balei Rida pham jubab hok…? ” ka la byrthen
“Phi iohi ne shu tip ba ka wan mih sha dukan…?” La tohkit sa i Kmie jong ka na u Panah
“Nga iathuh i Kong Mer …” La jubab u Panah
Ka Kmie ka la sngewthuh ba pleng ka khun ka la thok ia ka.
“Rida pleng mynta la stad sa ka thok mo… Ngam poi pyrkhat phan long kumne..” La ong i Kmie jong da ka jingbitar.
Kumta hi namar ba i dei i briew ba dom riang wut wut noh hi, i sei ia u dieng wah pyrda bad i la sdang ban bom ban tied biang ia ka Rida..
Phi don ban ong eiei?