Balei ianga?

Khana babteng

“Kumno kumto… Nga phohsniew pynban ia I Papa, i mat I iohi ianga. Shisha pleng ki briew ba la iap ruh ki iohi pleng iangi kiba dang im..” La mutdur ka Rida marwei marwei

Hadien katto katne por ka thiah biang bad ka kwah ban phohsniew biang hynrei kam phoh sniew shuh. Dang step phyrngab ha kata ka sngi ka la khie na jingthiah bad ka la leh khohreh bad dum bad dam ki kam ki kam ki jam, hadien ba la dep bam 9 baje ka la mih na iing ban leit thep ia la ka phom ha Kolej. Ynda ka la poi ha Kolej ka la hab ban ieng lain namar la bun kiwei ruh kiba na nongkyndong bad na Sor kiba la poi ha shuwa jong ka. Namar ka jingbun palat kita kiba ieng hakhmat jong ka, ka la ioh ban thep ia la ka phom haduh 12 baje. Hynrei na ka bynta jong ka, kam khuslai shuh namar ba ka la rah lypa la ka pisa bad ka la siew noh hi hangta. Ki nong pdiang ia ki phom ki la pyntikna ba kan ioh beit.

Hadien ba la dep nangta ka sa leit sha iew bad la ka Kmie ban iarap ha dukan. Haba ki para ba ia shong dukan marjan ki la ia kylli shaphang ka klas ka Rida ruh ka la iathuh beit ba la ioh ha Synod Kolej.

Bynta -2

Ki bnai ki leit ki bnai ki wan, na ka Aiom Lyur la beh sa ka lyer Synrai. Ka jingiaid stet jong ka por ym lab ba sngew thir thir ki mareh. Saw bnai la leit ka por ba ka Rida ka don ha Kolej. Ka long shisha ka khynnah kaba trei shitom bad ka dukhi khait ia la ka bynta kum ka nongpule. Kam ju pynsep ei ka por ha kawei pa kawei ka sngi. Hadien ba la wai klas ka leit iarap kam ia la ka Kmie sha iew bad shwa ban dum ka wan phai sha iing ban nang shet nang tiew. Kum ka khun baduk ka la ioh jingiaroh shisha ha ka jingtipsngi baroh ki para marjan bad ki ba ha iing ha sem ki da pyrto shisha ia ka jinglong jong ka. Haba phai sha ki Nonghikai ruh ki da iaroh shisha ia ka jingproh jabieng jong ka. Haba la rung ha u ‘Nai Risaw la dei artat ka por ban ialeh ia Eksam banyngkong hapoh klas. Ka Rida ka la trei shitom khait bad ka thiah sa tang khyndiat kynta eh. Kumta hadien katto katne taiew ba la dep ka Eksam, ka kyndit ba la khot ia ka da u Prinsipal ba kan wan iakynduh ia u. Ka Rida ka la dap da ka jingsheptieng bajur namar kam tip ia ka daw. Hynrei watla katta ruh kam banse ban leit, ka la iawer synran ia I Linda I para klas na Mawkhar. I Linda I la ap ha bar bad ka Rida ka la rung marwei. Marsien rung ka Rida u Prinsipal u la khot

“Ale ale hangne…Shong..” U la ong

“Rida phi sah haei kumto…? ” u la kylli

“Ha Jaiaw Shyiap Sir..” La iathuh ka Rida

“Phi don katno ngut shi para…?” U la kylli biang

“Tang marwei hi Sir..” La jubab biang ka Rida

“Mei I Pa ki trei aiu…” U buh jingkylli biang

“I Pa im don shuh sa tang I Mei.. I Mei I shong dukan ha iew…” La iathuh bniah ka Rida

“O kumta mo… Naduh mynno I Pa I khlad…?” La kylli biang u Prinsipal

“Dang shen ym pat re shisnem ruh Sir.. I Pa jong nga dei ito ba la thoh kotkhubor ruh iba shong iew bad I shah kitnab ha ki runar bad ki pyniap ia I ha Guwahati..” La iathuh bniah ka Rida

Marsien ioh sngew ia kata ka jingiathuh u Prinsipal u la sngewthuh bad kynmaw ia kata ka jingjia.

“O kumta mo…! Hooid hooid nga la kynmaw bad ioh pule ruh..” La kem ktien u Prinsipal

Ka Rida ka la jaw ummat artat hangta jrup.

“Wat khuslai Rida… U Blei hi Un kyrkhu iaphi…” La ong pat u Prinsipal

Kumta namar ba u Prinsipal u la iohi ba ka la lung mynsiem u pynphai noh sha kawei pat ka phang

“Rida nga khot iaphi ban iakynduh bad nga namar na ka liang ki nonghikai bad I Nonghikai ba peit ia phi I iathuh… ” u Prinsipal u la shim ia ka phyl khlem pat pynkut ktien.

U Prinsipal u la plie ia ka phyl bad u la ong ha ka

“Rida kawei ka ba la pynlyngngoh ia ngi ki Nonghikai, ka long ba phi jubab thik kumba la kwah ka jingkylli…Don ki nonghikai kiba la iathuh ianga ia kata bad nga la pan na ki ia kine ki jubab jongphi… Kine baroh ki la ai hanga..” La iathuh u Prinsipal bad ka phuh samrkhie

Ka Rida kam nang ong eiei shuh, ka la shu sngap shiphang …

“Mano bad kumno phi khreh kot…?” La buh jingkylli u Prinsipal

“Nga khreh hi lait noh tang katto katne ba ngam sngewthuh nga kylli na ki nonghikai…” La jubab ka Rida

U Prinsipal namar u iohi ba kam da lait bha ban kren u la pynkut nia noh da ka ba ai ktien kyrkhu ia ka

“To sa nang leh bha shuh shuh long ka ba sngew rit nang iai trei shitom, nga khmih lynti shibun ba na phi ka skul kan ioh burom” la pynpaw u Prinsipal u ieng bad khublei na ka kti jong ka.

“Kano kano ka jingeh sa ong ianga… Lada phi don.. Wat khuslai..” U la ban ktien shuh shuh

Ka Rida ka la jaw ummat jrup bad ka la ong

“Khublei shibun Babu…” Ka mih noh syndon nangta

Ka paralok kaba ap ha baranda ka la nang pyrkhat bun kiei kiei ba ka paralok ka slem. Hynrei ha mar kata ka por, ka Rida ka wan mih bluit

“,Phi la thait ap mo… I pynslem palat I Babu..” La kren nyngkong ka Rida

“Hooid kein nga lei lah nang tharai sniew….” Ong ka paralok bad ka rkhie artat

“Shano ei u bapli un shu leh hi kumta..!” LA said nia ka Rida

“Phi ia kren ia kaei mo. ?” La kylli ka paralok

“Em Babu I shu kren ban nang trei shitom… ” la iathuh ka Rida . Ka la buhrieh ia kaei kaba u Babu u kren ia ka. Kumta hi bran baroh ar ngut ki ia rung biang noh ha kamra klas

Kumba ju leh man la ka sngi hadien ba la wai klas ka Rida ka leit sha iew ban iarap kam ia la ka Kmie . Haba ka poi ha dukan namar ka jingkmen ka bym lah ong shuh ia kaei ka ba u Babu u la iathuh ha ka, marmar ka la kyrkieh ban iathuh jar jar ha la ka Kmie.

“Mei mynne I Prinsipal I la khot ianga sha kamra nga la sheptieng eh hynrei ngam banse ban leit…”

“Balei kein pha sha khot kumta ?… U ong kumno..?” La kem ktien ka Kmie

“Em Mei ynda nga rung I Prinsipal I pyni pynban ia ki jingthoh eksam jong nga… I iathuh ruh ba hana ki Nonghikai ki la lyngngoh ba nga dei lut…” La iathuh bniah ka Rida

“Kumta seh khun… Ni nga sngew kmen palat ba phi long kumta… Nang iai khreh minot khun ban pyndonburom ia la u kpa bad ianga ruh mo…” La phai ktien ka Kmie

“Hooid I Babu ruh mynne I la sneng bha ianga ban minot khnang ban pyndonburom ia ka Kolej.. I ong ba i khmihlynti shibun na nga hana…” La ban ktien biang ka Rida

Ka mynsiem ka kmie ka la kmen shibun eh haba ka ioh sngew na la ka khun ia kaei kaba la pynpaw u Prinsipal ka Kolej. Ha kata ka sngi ka la phah thied noh da u dohnud masi ban leit ia shet jyntah sha iing namar ka jingkmen palat na ka bynta la ka khun.

Ynda ki la poi ha iing baroh arngut ki la ia bunkam ban shet ia uta u dohnud masi.. Ynda la dep bam dep dih shuwa ban thiah ka Kmie ka la wer ia la ka khun ban pynlong ka jingduwai ainguh namar kata ka khubor. Kumta shikmie shikhun ki la ia pynlong ia kata ka jingduwai miet ban ainguh ia U Blei Uba la kyrkhu ia ka iing ka sem. [yn dang bteng]