Balei ianga?

Khana babteng

“Hooid to Niakha..” La phai ktien ka Rida

“Khublei shibun eh Niakha..Kane ka dei ka jingkyrkhu jong phi ianga U Blei Un nang kyrkhu ia phi….” La ban ktien biang ka Rida

Hadien ba la ioh ia ka pisa, ka Rida ka shong sa tang shiphang ar phang bad ka la mih noh nangta bad la ka paralok. Lynter lynti I paralok ka Rida I la bun nia ban iaroh haduh katno ka jingbha jong I Niakha ka paralok.

“Ka jingbha I Niakha jong phi te la palat mo… Ka mut in kyrshan ma I iaphi…?” Ka la buh jingkylli

“Hooid in kyrshan mynta shi snem I la kular ..” La jubab ka Rida

“Best palat I Niakha jong phi..” La iaroh ka paralok

Ha ba la poi ha Mawkhar ka paralok la nang leit noh sha la iing katba ka Rida pat ka leit sha iew ban iakynduh bad la ka Kmie ha dukan.

“Mei I Niakha I la ai ka pisa ruh na ka bynta ba ngan siew noh lashai ha Kolej…” La iathuh ka Rida

“O kumta Khun…! Ani I la da ai noh hi… !” La kren ka Kmie kumba kyndit

“Hooid kein I ong ban tikna ka jingioh rung klas..” La pynshai ka khun

” To ai nguh ia U Blei uba ai Niakha kum I Kha jong phi khun… Hynrei te la eh ia nga ban kyrshan iaphi…” La ban ktien sa ka Kmie

“To sa leit siew noh lashai kumba I bthah..” La ai jingmut sa i Kmie jong ka

“Hooid Mei…” La jubab ka Rida

Kumta namar ba ka bneng kam pat dum ka la iarap kam lem shuwa ha dukan bad la ka Kmie haduh ban da dei ka por khang.

Haba ki la poi ha iing mynmiet ka Rida ka khohreh ban pynbiang lypa ki kot ki sla kiba donkam na ka bynta ban thep ha Kolej, katba I Maya pat I Kmie jong ka I nang bunkam ha ka shet ka tiew. I kong Maya I la sngew kmen eh haba ka lad ka la plie ba ka khun kan leit ban pule ia ka sobjek kaba ka sngew tynnat ha ka jingpule jong ka. Hadien ba la dep bam dep dih ki shi Kmie shi khun ki la duwai ai nguh ia u Blei Uba la don ryngkat bad ki ha ka jingiaid lynti kaba khlem u Kpa bad hadien ba la dep duwai ki sa ia thiah noh artat la ka jong ka jong ka kamra.

Ha kata ka miet ka Rida ka la phohsniew ia la u jong u Kpa ba u wan ban ialam ia ka ban leit thep ia ka phom ba la dep pynbiang lut ki jingdonkam baroh sha Synod Kolej .Hadien ba la dep kam nangta u Kpa jong ka u ialam dihsha ia ka ha Sundawn Restaurant, ka ba don ha Jaiaw bad hangta baroh ar ngut ki ia bam da u shaw doh syiar.

“Kumno phi bang khun..? ” u kylli ia ka katba dang bam

“Bang bha hi kein Papa..” Ka ruh ka la jubab

Haba la dep nangta ki ia mih ban wan phai noh sha iing… Dei hangta ruh ba ka Rida ka kyndit noh na ka jingioh thiah namar ba wan par ka khnai ha khlieh thiah jong ka.