Balei ianga?

SKN
[ba bteng] “Ni ym lah ap shuh phi Mei ieid, ngin leit noh sa shu iathuh lem mo ba nga wan wad ma nga…” La ong ka Rida
Kumta wut ki ia pynbeit la ki kjat sha la iing la iing.

Haba la poi ha iing ka Rida ka la shet sha ia lade bad ia la ka Kmie. Katba dang ia dih sha, i Kmie jong ka i la kylli
“Pha poi iew ne em…?”
“Em, nga khlem poi nga shu leit ha iing i Linda…” La jubab ka Rida
“Nga shu kylli ioh pha poi namar ba pha la slem…” La ong pat ka Kmie
Watla ka Kmie kam tip ia ka jingshisha hynrei ka mynsiem ka Rida ka la sngew pap hi ha lade namar ba ha ka jingshisha ka leit khnang sha Iew. Hynrei namar kam kwah ban iathuh ka la kun la ka kun ha la mynsiem. Kumta hadien ba la dep dih sha ka la khohreh sa ka shet ka tiew kumba ju long. Ynda la dum ka bneng u Panah u la wan iing. Ka Kmie jong ka, ka la bthah ban shet sha ia u. Ka Rida ruh ka la leh kumba la bthah ka Kmie ka la leh don burom ia u watla kam da sngewtynnat than.
Hadien ba la dep dih sha u Panah u la kylli ia ka
“Rida mynne phi wan sha dukan mo….?” U ap ba kan jubab
Kane ka jingkylli ka la pyn jnang khak ia ka Rida ban jubab.
“Balei phi kylli…?” La phai ktien ka Rida
“O ym long shuh ban shu kylli ruh…?” La ong pat u Panah
“Long balei ym long…?. Tang ba kumta hi kein… Da sngew pher ka rukom kylli jong phi” la jubab ka Rida
Marsien kumta la iohsngew ka Kmie jong ka, ka wan mih hangta bad kem ktien
“Balei…? Nga sngew phi ia kren aiu..?” Ka la kylli sa ma ka
“Em nga shu kylli na i Rida pleng i wan na dukan mo mynne.. Hynrei i kylli kylla pynban balei nga kylli ..” La iathuh u Panah.
Kane ka jingiathuh u Panah ka la pynbitar leb ia ka Kmie jong ka.
“Balei Rida pham jubab hok…? ” ka la byrthen
“Phi iohi ne shu tip ba ka wan mih sha dukan…?” La tohkit sa i Kmie jong ka na u Panah
“Nga iathuh i Kong Mer …” La jubab u Panah
Ka Kmie ka la sngewthuh ba pleng ka khun ka la thok ia ka.
“Rida pleng mynta la stad sa ka thok mo… Ngam poi pyrkhat phan long kumne..” La ong i Kmie jong da ka jingbitar.
Kumta hi namar ba i dei i briew ba dom riang wut wut noh hi, i sei ia u dieng wah pyrda bad i la sdang ban bom ban tied biang ia ka Rida..
“Pleng mynta nga sngewthuh imat pha ia suh buit bad kato ka Niakha jong pha wat ban knieh noh ia kato ka dukan ruh” Ka la byrthen bad kynnoh katba dang bom dang tied.
Ka Rida ka la iam rangbah bad ka la hab ban panmab shi pan mab haduh ba i Kmie jong ka in sangeh ka shoh ka bom ia ka. Kumta hi bak ka leit rung sha la kamra thiah bad iam pangnud hangta marwei. Kane ka jingjia ka la nang kynton ka jingkhuslai ha ka mynsiem ka Rida.
“Haduh katne i Mei in leh ia nga tang namar ba i ieid ia u Panah…” Ka Rida ka la kren wei briew ha la mynsiem.
Ka Rida mynta naduh kata ka sngi ka la duh ka jingshaniah ha la ka Kmie bad ruh ka mynsiem isih ka la rung hapoh jong ki iwei ia iwei pat. Ar sngi hadien ka Rida ka la iathuh ha la ka Kmie ba ka donkam ban leit sha klas, hynrei ka Kmie jong ka, kam shah shuh .
“Em wat leit… Klas aiu kata..? Khun ka men thok. Katto ia pha ngan ym shah shuh phan leit shano shano ruh. Mynta pha la heh tip mano ioh pha leit kynduh samla baroh..” La kren dait pynban i Kmie jong ka.
“To seh Mei ba nga donkam eh…” La kyrpad ka Rida
“Em te em… Kam aiu phan leit ong ngan leit ma nga..” Tdot i Kmie jong ka i khlem ai lad.
Ka Rida ka la hab ban rung biang noh hapoh iing bad da ka jingdom ka la rung sha la kamra thiah jlang ka sngap jar.