BALEI IA NGA

S.K.N

[ba bteng] “Wow ka pap aiu eh kum kane ka ba wanjia ia i bapli i Kong Maya..” La ong u Rangbah Shnong
Baroh kiba poi ha kata ka iing ki la dap da ka jinglyngngoh lyngngain ia kata kaba jia. Hadien katto katne por wan poi sa ka Niakha ka Rida ban wan khot ia ka ban ia leit noh sha Police Station. Hynrei ka kyndit thret ban iohi na naduh phyllaw la dap shibun ki briew kiba ieng kiba shong hangta.
“Jia aiu kumne …?” la kylli ka Niakha na uwei u Rangbah briew ba ieng shabar ka phalor.

“Phim dei i Niakha ka Rida…” la kylli uta u Rangbah.
“Hooid nga dei…” la jubab ka Niakha.
“Rida kam don shuh…” la iathuh uta u Rangbah.
“Waw ka pap, balei kumta…” la shu mih kynsan ka sur na shyntur ka Niakha bad ka rung wut wut sha iing.
Kliang nang lynniar tyngeh ka kmie ka Rida mar sien iohi ia ka Niakha.
“Ka Rida ka la pynniap ialade… Niakha…” la iathuh ka kmie ha ka sur ba iam.
Kumta hi ka Niakha ruh ka la lynniar bad iam Rangbah. U Rangbah shnong u la shu shong khop khlem nang ong ei ei shuh.
Hynrei ha ka jingiam jong ka Niakha u sngewthuh ba pleng dei na ka jingshah khot hajir sha thanat. Mynta u Rangbah shnong u la sdang ioh kem.
“Uhh kane ka kam te kaba eh shisha phi…” la pynpaw u Rangbah shnong ha kita kiwei pat ki Rangbah kiba ia don ryngkat hangta.
Hamar kata ka por la wan sa ki pulit bad ki la shim noh ia ka met na kata ka jaka ba la sdien ha kamra sum. Hynrei namar ba ka dei kaba armet. Ki pulit ki la rah mardor sha Aspata na ka bynta ban khmih ki doctor kumno shaphang i khyllung ha ka kpoh bad ruh ban leh ia ki kam kiba dei katkum ka ain.
Ka jingiam briew ka la shlei miar ha kata ka iing. Khamtam haba kiwei ruh ki la tip shaphang ka daw ka jingiap. U Rangbah shnong bad kiwei pat ki la ialeh ban pyntngen ia i kmie bad ruh ia ka Niakha jong ka Rida bad ynda la kham jai jai ka Niakha ka Rida ka la sdang ban iathuh ha u shaphang ka jingshah khot hajir ka Rida kaba dei hi ban leit mih ha kata ka sngi.
“Bah ngam lah ban khlem da sngewsih jur eh, namar imat dei na kane ka daw ka jingshah khot hajir ha ki pulit kaba la ktah shibun ia ka jingmut jingpyrkhat jong ka khun bapli. Haduh ba kan da bthat syndon ia la ka jingim…” la pynpaw ka Niakha.

“O shah khot mynta ka sngi balei…?” la buh jingkylli u Rangbah shnong.
“Kato pat ka case u Panah jong ka…” la iathuh biang ka Niakha.
“O ka la dei namar ka khynnah ba shida shisur kumto ka la sngewsih bad kulmar jingmut…” la bynrap ktien u Rangbah shnong.
“Hooid kein phi… Haba i Nia i la wan hajir, hynrei dang khot sa ia ka khun…” la bynrap ktien sa ka Niakha
“Ngam tip shuh kumno kumta ka briew kaba dang armet ruh khlem mab shuh ban khot hajir…?” la ong biang sa u Rangbah Shnong.
“To ih kaba la dep la dep… mynta nga la synei palat ia i Nia… Nalor ba ki sah tang arngut hi mynta sa kumne..” la pynpaw biang ka Niakha.
“To yn leh shuh kumno kong ngeit ba u Blei un ym ihnoh ia i… Ngi na ka shnong ruh katba lah ngin iarap ban don ryngkat bad i…” la pynpaw u Rangbah Shnong.

U Rangbah shnong u la phai sha i kmie ka Rida
“Kong ngin leh kumno lada lah wanrah ia ka met… Ngin tep lano…?” la pan jingmut u Rangbah Shnong. [yn dang bteng]