BALEI IA NGA

S.K.N

[ba bteng] “O hooid kein.. i Rida te i biang hi kumto…” La shu jubab lyngkot ka Kmie ka Rida.
Hadien ba la mih ka Kmie Rida na dukan, i Kong Mer i la sdang ban lorni shaphang ka Kmie ka Rida.
“Haba kumto i Kong Maya im ioh khun shuh imat?” La buh jingkylli i Kong Mer.
“Im ioh shuh phi i Nia… Ngi lei mynta ngi ia khuslai bha shaphang jong i…” La sdang pur khana ka Niakha Rida.
“O phi ong kumta…?” La pynpaw i Kong Mer.

“Hooid kein, ni ym sngew nang shuh ban ong kumno kumno ruh..” La ong pat ka Niakha Rida
“Kaei eh ka daw …?” La kylli i Kong Mer
“Ym sngew kwah pur khana shaphang kata, namar ka dei ka kam sang kam pap” la iathuh ka Niakha Rida
“Iano ka jia kumta…?” La kylli biang i Kong Mer
“Ia kato ka khun jong i Bah kein phi…” La jubab ka Niakha Rida
“Jia aiu kein…?” La kwah tip noh i Kong Mer.

Hadien ba la sdang ka khana kumta, ka Niakha Rida kam banse ban iathuh tang ka phang shaphang ka jingarmet ka Rida. Nangta hadien ka jingiakren ka sa tip ba pleng dei u Panah uba leh ia kata ka kam.
“Phuit ka briew mynta te phi kaba da eh shisha shisha, u soitan u la ioh shong kulai sa ia ka khun ruh khlem riej shuh…!” La bynrap ktien lem ka Kong Mer
“Hooid kein phi haba ong ni, ngam sngew nang pyrkhat shuh. Peit myntan i Nia i wan iathuh ba hab sa ban leit mih sha Thanat, na ka daw ban shah tohkit, to lashai ngan hab leit synran ia i..” La iathuh bniah ka Niakha Rida
Kumta hi ki ia pynkut noh ka khana shaphang kata hadien na i Kong Mer i ong
“Ka mat ia dep shato… Ka pap ka lap hi bad ka pynshitom hi..”

“Hooid ka dei” la kubur ka Niakha Rida
Haba phai pat sha ka liang ka Rida bad ka Kmie jong ka, hadien ba la ioh ia kata ka khubor ba ka hab ban leit mih sha Thanat, ka la pyndap hapoh jong ki da ka jingsngewsih bajur. Ka Kmie ka Rida ka la sdang ban babe ia kaei kaba la jia. Kumta ki la sdang ruh ban iamai iania shi khun.
“Tang na ka daw ba pha kwah sngewbha ma pha peit mynta jynjar ong…” La byrthen ka Kmie
“Phi la shu ong…” La phai ktien sa ka Rida
“Lashai ngan hab ban leit sha Thanat… Ngam tip shuh kaei ka ban jia…” La ong pat ka Kmie.

Ka Rida ka la dap da ka jingsngew rem bajur kam nud phai ktien shuh.
“Mab Mei…” La shu mih napoh ka shyntur jong ka.
Hapdeng ka miet badum jong kata ka sngi shuwa ban leit sha Thanat, ka Kmie ka Rida kam nang thiah nang dem shuh. Ki khia ka jingmut jingpyrkhat namar ka kam pat ju lap kum kata ka jingjia ha ka jingim jong ka.
“Pleng kaba jynjar eh than ha ka tam sneng ki khun te…” Ka la kren wei briew
Kumjuh ym tang ka Kmie kaba long kumta; hynrei ka Rida
ruh kumjuh ka la shu lynga la shu pisa baroh shi miet haduh ban da shai ka sngi bloit. Hapdeng jong kata ka jingiaksaid ka la dap da ka jingmut basniew, wat haduh ban shim noh ia la ka jingim.
Haba ka step ka la pei baroh arngut shi Kmie shi khun ki la iakhie ym slem ruh ka Niakha ka la wan mih hi shaduh iing ban leit noh sha Thanat. [yn dang bteng]