S.K.N
[ba bteng] Ka synnia ka wan bad ka jingkhuslai ka ban ha ka jingmut jingpyrkhat, jong ka Rida. Ka Kmie jong ka ruh kam nang thiah nang dem shuh baroh ar ngut shi khun shi kmie ki sngewthuh biang biang ba ka jingeh kane ka la wan ha khmat ka jingkhang iing jong ki.
“Rida ngam sngew nang pyrkhat shuh … Lashai lehse ki pulit kin wan ban kem noh ia u Panah jong pha… Phi la sngewthuh ong mynta haba la jia kumne ba sa shem jingeh hynrei myn ha shuwa i kumba phim patiaw ei ei. Nga la kren nga la sneng bad nga la i shong pher phi ia len sop sop mynta te phi sngewthuh ong..” La pynpaw ka Kmie.
Ka Rida ka la shu iam bad kam lait ang shuh ban ong ei ei namar ka Kmie jong ka, ka la kren ia ka ba dei eh.
“Mei mab ia nga… Mynta nga la sngewthuh ba nga ruh nga dei kawei ka ba kit ia ka pap ka sang” la pynpaw sa ka Rida
Ka Kmie ka Rida da ka jingpynat ka la leh kum ka bym bang kren shuh..
“Te mynta hab kit pap ong ka iing ka sem…” La ban ktien biang ka Kmie
Hadien ka jingiakren sob sob, baroh ar ngut ki sa ia leit thiah noh la ka jong ka jong khlem da pynbur shuh ia ka ding.
Haba phai pat sha ka liang ka Niakha ka Rida, haba la poi ha iing ki la pynpaw ba ki la hun ba la shem ia ka daw kaba pynmih jingeh ha ka jingim ka khun Kha jong ki.
“Mynta ngin ap sa tang ka por ban kem noh ia uto u ksuid kynsha ” la ong ka Niakha.
“Phin leh kumno Mei, da ei pat i Nia in bam in sa…” La kylli u Khun
“Kata kein me mynta ngin hab long ba la khreh na ka bynta kata ban bsa bad ai lynti ia i Nia jong me bad i Bakha tang ba kin im…” La jubab ka Kmie
“Mei, nga te nga ong, lada i Nia bad i Bakha kin iaid beit nangne sha khmat na ka bynta ka burom i Mabah ngin hab ai pyniaid biang ia ki ka dukan kein ha Iew” la ai jingmut u Khun.
“Ngin sa ia peit me katba ialam ka por..” La pynkut ktien ka Kmie
Ka miet ba dum kam ai thiah ai dem ia ka mynsiem ba iatip lem ka Rida. Ka lynga ka pisa bad ka sngew pap ia lade khait namar ba ka ruh ka la bakla da kaba ka leh ieid leh jan ia la u Panah haduh ba un da nud ban leh trai ia ka. U syiar u kynih lai sien, ka bneng ka la saw tyngab; hynrei ka Rida kam nang iohthiah satia. Kyndit kynsan katba ka nang pyrkhat bad mutdur shaphang i khun ba ka pun hapoh kpoh bad ba ynda la kha kan long ka jingjah burom bakhraw shibun eh ia ka. Haba ka pyrkhat ruh shaphang ka jingpule bad shaphang ka jingkhmih lynti ki nonghikai ka sngew jah burom shisha bad kam sngew myntoi shuh ban im. Kum kane ka la rung ha ka jingmut jingpyrkhat ka Rida.
Ka step ka la pei, u Panah u la khie kumjuh ka Rida bad ka Kmie ruh ka kmie ka pynshet sha bad katba ki dang ia dihsha kyndit ki sngew ba don ba plie ia ka phalor. Mar kumta hi, ka Kmie ka Rida joit ka ieng nangta ban leit peit. Ka kyndit ban iohi khrui ki pulit ki wan rung hapoh phyllaw jong ka. Beit beit ki wan haduh khmat jingkhang. U Panah ka Rida mar kumta u la sngewthuh joit u ieng ban leit sha kamra thiah.
“Dei uto ong ..?” La kylli uwei u Pulit
Kumba set da u maw ka Kmie ka Rida kam lait ang ka shu kohnguh. Ki pulit ki shu leit bad kem ia u hangta. La teh ia ki kti jong u bad ki tan ia u.
“Haduh katne phi lehbein ia nga…” La shu mih kynsan ka sur na u Panah ka Rida.
La thep ia u hapoh kali bad la khang ia ka kali bak ka kali ka leit noh bran. [yn dang bteng]
Phi don ban ong eiei?