Khana babteng –
Ka Rida ka la rit mynsiem ria naduh ba wan u Panah. Ka dur phuh samrkhie bad ka jingiakren ia kane katai bad la ka kmie ka la sdang duh. Wat ka Kmie jong ka ruh ka long hi kumta namar ka la bunkam bad pynlut bun ka por tang bad la u tnga thymmai. Hapdeng kita ki khyndiat sngi lei lei, I kong Maya wat ia la ka khun ruh kam da kren bha namar ka sngewthuh ba ka Rida kam da sngewtynnat than ia u Panah. Kumta ka jingiadei hapdeng ka Kmie bad ka khun ka la jngai khyndiat ym shuh kum mynshuwa. Ka jingsngewsih ka Rida ia kata ka jingjia ka la paw pyrthei ha ka dur khmat jong ka ha kawei ka sngi katba ka dang leit iakynduh ia la Ka paralok ka ba ka ju ieid eh ha iing jong ka da ka ba ka la kylli ia ka katba dang ia shong kai…
“Balei Rida phi I khuslai bad I khia jingmut bha mynta..?”
“Em ym lei lei phi ..? ” la jubab ka Rida namar kam nud ban iathuh
“Phi sngew pang ne..? Kylli biang ka paralok
“Em ngam sngew eiei toi, Balei phi kylli kumta..? La jubab bad kylli kylla ka Rida
” Ka dur khmat jong phi ka iathuh ba phi I khuslai ne ym I leh khlain ka met…” La kren rangbah ka paralok
“Em ngam sngew eiei toi …” La jubab biang ka Rida
Hadien ba la iohsngew ia kata ka jubab ka paralok ruh kam bun ktien shuh hynrei ki shu ia shongkai noh kumba ju sngew tynnat. Hadien shiphang ar phang ba la ia shong kai hangta ha iing ka paralok ha Mawkhar ka Rida ka mih noh ban leit sha iew sha dukan bad la ka Kmie. Lynter lynti katba dang iaid ka Rida ka pyrkhat
” pleng ka jingsngewsih jong nga ka la paw wat ha ka dur khmat ruh, ka paralok ka la ithuh ianga hynrei nga hab ban dang buhrieh tangba ha kawei ka sngi ngan iathuh beit ha ka ia kaei kaba jia ha nga…”
Ynda ka la poi ha iew u Panah u la don hangta ban ap ia ka Kmie jong ka. Shiphang ar phang ka iarap kam hangta ka la dei artat ka por ban khang noh. Kumta ki ia mih na dukan lai ngut bad katba ki dang ia iaid lynti kumba iuh tdong bsein, I Niakha ka Rida I la iakynduh iaki ha Motphran. Marsien iohi ia la ka Niakha ka Rida ka la doh la dait ia ka.
” kumno khun phi dang wan iew ne…. ?” La kren I Niakha
” Hooid Niakha ngi dang ia wan iew…” La jubab ka Rida
U Panah u la nang kam sha khmat bad u ap ha marsyndah hi jong ki hi.
“Sa wan mih seh ynda lap por mo Nia…” La ong ka Niakha ha I Kmie ka Rida
“To Niakha ngin sa wan …” La jubab I Kmie ka Rida
Namar ba ki iakyrkhieh kim ia ieng slem
“To Nia ngin sa kynduh mo ba nga kyrkieh sa da wan mih teng teng. .” la pynkut ktien I Niakha ka Rida
“Rida phi ioh shuti ong mynta …?” La kylli I Niakha
” Hooid..” La jubab ka Rida
“To sa wan mih khnang noh phi lashai sha iing mo…” La ong I Niakha
“To Niakha …” Ka Rida ka la shu kohnguh beit
Hadien ba la lait ka khmat I Niakha ka Rida, u Panah u la kylli
” Mano ito phi iakren…?”
” Ito dei I Niakha ka Rida …” La jubab I Kmie ka Rida
“O kumta mo…” U shu sngap noh
Haba la poi ha iing ka Rida ka la pynpaw ha la ka Kmie ba kan hab ban leit sha Mawlai kumba la bthah wan I Niakha. Hangta I Kmie jong ka, I la khang ia ka ban leit
“Em ynnai pat leit lashai …”
“Sa leit pat nga ruh ngan hab leit mih kein…” La ban ktien biang ka kmie
“Haba I Niakha I la phah wan noh te….” La iasaid nia ka Rida
Hangta ka Kmie ka la ong biang
” Haba nga ong ynnai pat leit lashai sa leit kein….” Ban ktien biang ka Kmie.Hangta ka Rida ka sngewthuh ba ym lah ia leh ktien shuh. Kumta ka la shu pynkohnguh jubor noh ha ka mon ka Kmie. Ha kata ka miet ka Rida ka la sngewsih ha la dohnud marwei marwei watla kam pynpaw eiei shuh. Katba ka dang puson marwei la marwei ha jingthiah, khatduh ka shim ia ka rai ban leit be it sha iing Mawlai ban iakynduh bad la ka Niakha ha ka sngi babud khlem da panbor shuh na la ka Kmie. Dei ynda haba ka shim ia kane ka rai ba ka sa iohthiah suk.
Ha ka step babud kumba ju smat ju sting kumta hi ka Rida ka pyndep la ka kamram. Ka Kmie jong ka bad u Panah ki khie kham hadien. Haba la dei ka por leit iew ka Kmie ka la mih na la iing bad u Panah ban leit plie dukan noh. Hadien ba la mih ka Kmie ka Rida pat ka la nang trei pynstet la ki kam ki jam baroh ban niad um ia ka iing bad khlieng tiar khlieng tar. Hadien ba la dep lut kita ki kam ka sa bamja bad ka khreh ka khrum ia lade ban leit sha iing ka Niakha. Ka iaid suki suki da ka kjat haduh jingkieng Wahumkhrah Polo bad ka sa bat taksi ka ba leit sha lad Mawroh. Thop shi thop ka hab iaid biang da ka kjat na lad Mawroh haduh ban da poi ha iing ka Niakha.
Marsien rung ha phyllaw iing ka Niakha, ka la pyrta bad sa wan mih iwei I Khun ka Niakha
“Mei mei la wan I Bakha…” La pyrta ita I khun ka Niakha
Mar kumta hi ka Niakha I Rida ruh ka la mih
“Khun phi la wan….” Ka la ong bad kdup bad ialam ia ka sha poh iing.
“Hooid Niakha….” La jubab ka Rida
I Bakha jong ka I la shet sha shet dud bad I la wanrah hangta ha kamra ba ki ia shong.
“Ani Bakha balei phim ong ba ngan wan shim ma nga…” La pynpaw ka Rida
“Em phi haba phi wan sha iing jong ngi ngin leh ma ngi kein. .” la phai ktien ka Bakha
“Dih noh khun ka sha…” La kynto ka Niakha
Hadien ba la dep dihsha ka Rida ka la leit rah sha jaka khlieng tiar bad ka sait noh ia kita ki pela ba ki ia dihsha. Nangta ka leit ban ia shong kai biang bad la ka Niakha. Ka Niakha ka la leit Pisa na kamra bad ka ai ha ka Rida ba kan ioh siew bai klas. Hadien ba la ai ia ka pisa ka Niakha ka la kylli shaphang ka Kmie jong ka. Dei hangta ka Rida ka la hab ban iathuh kumba ka long.
“I Mei te Niakha mynta I la ioh Panah…”
“O mynno kata khlem tip, u briew ba nangno…?” La bniah ka Niakha.
Khana babteng –
” O phim pat tip mo Niakha…?” La buh jingkylli pat ka Rida
” ngam pat tip kein khun…” La jubab I niakha
Ka Rida kam banse ban iathuh..
” U briew te dei uba na nongkyndong tangba uba sah ha Umsohsun bad uba leh business ha iew…” La iathuh ka Rida
Nangta ka Niakha ka la sngew synei palat ia la ka khun kha (Rida); ka la shu kyrngah khlieh, khlem nang ong eiei shuh. Ha ba ka por ka la don lai baje noh sngi, kumta hi ka la khreh ban mih noh.
“Niakha nga te la dei ka por ba ngan leit noh namar ioh ym lah pyndep kam shuh sha iing…” La pynpaw ka Rida
“Hooid to khun, sa da wan mih beit shane lada don jing eh eiei mo.. Sa da ong ia I Mei ruh ban wan mih shane…” La bthah ka Niakha
“Em Niakha ngan ym lah ban iathuh ha I Mei ia kata namar mynta ruh nga shu wan tuh, toi I Mei im shah ba ngan wan marwei I ong ban ap ba in wan ryngkat ..” La phai ktien ka Rida
” O kumta ..! To to ym lei lei khun to ynnai ong eiei, to leit suk mo…” La ong pat ka Niakha
Kumta hi ka Rida ka mih noh nangta bad ka leit bak sha iing.
Lynnong- 3 Hadien ba la tip ba ka Rida ka la ioh Panah, na ka liang ki Niakha jong ka ki la sdang ban ia pyrkhat shaphang ka dukan ha Iew. Ka daw ka long namar ia ka dukan la ai da ka Mei kha ka Rida ha la u khun ba un lah ban bsa khun bsa kti. Ka jingpyrkhat ka la mih ban knih noh ia kata ka dukan wei haba I Kmie ka Rida I la don la u Panah u ban bsa bad peit ia ka iing ka sem. Baroh na ka liang ka iing Niakha ka Rida ki la sngew dei ia kata. Hynrei tang ita I Niakha Duh jong ka iba ju iarap ruh ia ka Rida I dang pynjem ban ap shuwa ba ka Kmie ka Rida kan da wan mih sha iing sha sem jong ki ban iathuh hi na lade ia kata ka lynti ka ba ka la jam. Kumta hadien ka jingiakren na ka liang ka iing Niakha ka Rida ki la aiti bad shaniah beit ha ka jingstad ka Khatduh jong ki namar tang shu knih ia kata ka dukan ruh kan dei ma ka hi ka ban pyniaid hi noh.
Hadien jong ka jingiakren ia kata, I Niakha Duh ka Rida I la ap saw bnai ruh i Kmie ka Rida ka khlem leit mih lait noh tang ka Rida ka ba leit mih hi thuit shi thuit marwei. Kumta haba ki sngi ki por ki la nang iaid, na ka liang ka Niakha, kam lah ap shuh namar ka la ithuh ia ka jingleh klet i Kmie ka Rida. Kumta ha kawei ka sngi Ribibar ka sngi bym plie dukan ka la wan mih hi noh da lade sha iing ka Rida khlem ai kano kano ka jingtip lypa.
Haba ka la poi ha khmat iing, ka la shu pyrta beit
” Ko Rida, Ko Rida…”
“Oi mano…?” Marsien ioh sngew ia ka sur khot, la thie ka Rida na iing bad mareh de ban peit.
“O I Niakha, phi wan shane…?” La kren ka Rida bad ka doh ka dait ia ka.
“Ale ale Niakha…” Ka ialam sha iing
“I Mei I don…?” La kylli ka Niakha
“Hooid I don Niakha…” La jubab ka Rida. I Kmie ka Rida I ba dang don sha kamra thiah bad la u lok. I la sngew kyndit thret. Mar kumta hi I la khie pynstet bad wan kren ia I Niakha ka Rida.
“Kumba iuhtdong bsein phi wan mih shane… Kumno phi long Niakha…?” La kren I Kmie ka Rida
” Nga biang hi Nia, hooid kein nga khlem ioh pyntip tangba nga shu wan la ka wan namar nga ngeit phin don beit hi sngi Robibar kumne…” La phai ktien I Niakha ka Rida
“To to, shong shong Niakha…” La ong pat I Kmie ka Rida
Kumta ia lade ka mih sha kamra sum ban leit bta khmat shuwa. Hadien ba la dep bta khmat ka la wan mih biang sha kamra shong kai sha ba don ka Rida bad la ka Niakha.
Ha ba la don ka Kmie, ka Rida ka la nang leit tiew sha noh na ka bynta la ka Niakha. Hangta I Kmie ka Rida I la iathuh hi ha I Niakha ka Khun shaphang ka jingioh lok jong I da uwei.
“Niakha nga la mut ban wan sha iing jong phi ban ioh iathuh ia ka jingshim kurim noh jong nga da uwei; hynrei ngam pat da ioh por phi la da wan mih hi noh kumne…” La pynsngew I Kong Maya
“O naduh mynno Nia…?” La lorni I Niakha
” Pat da slem hi re…” La iathuh I Kmie ka Rida
“To ym lei lei Nia, haba I Bah ruh I la shu ieh noh iaphi tang shiteng por te.. Ka bha kein ba phin ia shngain…” La phai ktien pat I Niakha ka Rida da ka sur ba jem.
Ka Rida ka la wan rah sha hangta..
” Dih noh shuwa Niakha…” La ong ka Rida
” O to to khun..” La phai ktien ka Niakha
Kumta katba dang ia dihsha ki la bteng ka iathuhkhana artat.
“Nia nga mut ban shu ong ia phi tang kumne… Hooid ngi sngewthuh ia ka jingeh jong phi; hynrei ngim banse ban leh ia kaei ka ba dei ban leh..” La pynpaw I Niakha. Hangta marsien ioh sngew ia kita ki ktien I Niakha, I Kmie ka Rida I la sngew pher bad I la sngew ma kumno re..
” phi kren ia kaei Niakha, ngam ioh kem…? ” la buh jingkylli I Kmie ka Rida
“Em nga mut ban ong ia phi, ba ngi la tip ia ka jingioh Panah ka Rida, te ngi na ka liang ka iing ngi la iakut ban shim noh ia kato ka dukan ha iew, namar ia kato ka dukan I Mei I la shu ai pyniaid ha I Bah ba in lah ban bsa ia phi bad ia ka Rida. Hynrei mynta I Bah im don shuh, phi ruh phi la don la u nong bsa te ngin shim noh ia kato ka dukan..” La iathuh bniah I Niakha
Kumba wan kah kyndit u lyoh iong i Kmie ka Rida I la dum ka pyrthei ngain.
” Ade phi ong kumta, Niakha, nga pat nga nang mut ba la ka dukan I Kpa ka Rida hi.. Te kumno mo kumta im ju iathuh khana te ia nga shaphang kata pat…” La pynpaw I Kmie ka Rida
” I Bah nga tharai im pat poi pyrkhat ban iathuh ia kata.. I la da lap ba iap noh..” La pynshai I Niakha
“Hooid kein Nia, te yn leh kumno kumta, nga la khmihlynti shibun ban ioh iarap na ka dukan, ha ki jingdonkam baroh, khamtam ruh na ka bynta ka Rida, ka bai skul shano, ka bam ka dih bad kiwei ki jingdonkam..” La pyni nia I Kmie ka Rida
” Hooid Nia ka dei ka ba phi ong, tangba kawei ngan ong ba na ka bynta ka Rida ka ba dei ka Khun u Hynmen jong ngi, na ka bynta ka bhah jong u, ngan sa tip hi ma nga ia ka nadong sha dong..” La phai ktien I Niakha.
I Kmie ka Rida bapli I la dum ka buit ka stad bad im lait kren shuh da kumwei pat. Ka sha ha u pela kam lut shuh na kti I Kmie ka Rida. Haba ka Rida ka wan mih hangta ban lum noh ia ki pela, I Kmie jong ka I la buh la ka buh noh.. U Panah uba la nang sngap siar na kamra thiah u la dap da ka jingsngew synei ia la lok.
” Kane kawei ka ba nga kwah ban ong ia phi Nia ba phin ym sngew eiei, namar kane, hynrei ka jingiabha kan iai neh bad wat klet iangi haba phi donkam eiei khamtam na ka bynta ka Rida..” La pynpaw biang I Niakha
” Em ngan sngew kumno hi Niakha haba ka dei ban long kumta… Nga shu pyrkhat synei ia ka Rida bapli ka khun tang na ka bynta ka jingdakaid jong nga ka duh wat ia ka jingkyrkhu ba u Kpa u la ialam bad la khreh lypa..” La pynpaw lem I Kmie ka Rida
“Ym lei lei wat pynkhuslai na ka bynta ka Rida, na ka liang jong nga katba ka dang leit skul ngan kyrshan bad lada ka kwah ban wan sah noh bad nga ruh nga kloi ban pdiang ia ka..” La kular I Niakha. Na ka jingiashong kai ba sngewtynnat haba sdang, marsien poi ha kata ka kam dukan I Kmie ka Rida im nang shuh ban iathuh khana, namar ka mynsiem jong I ka la diaw eh… [yn dang bteng]
Phi don ban ong eiei?