BALEI IA NGA

S.K.N

[ba bteng] “Ngin leit noh tang bad me mo lih.. Ka dei me khun kata..” La mynjur ka Kmie
“Ngin tohkit bha jai… Ngin khroh ia i Bakha bad lada i treh lei ngin wan ialam noh shane…” La ban ktien biang u Khun heh.
“Ka dei kata khun… Nga lei nga isynei palat ka bapli … Katto ka jingstad hynrei mynta haba kumne shu lehnohei…” La phai ktien sa ka Kmie
Ka jingiasyllok shaphang ka jingbha ka Rida ka la nang pyndom riang ia ka mynsiem jong ki shi Kmie shi khun. Ki la kut jingmut ban leit mih beit ha ka sngi babud mynmiet.

Haba phai pat sha ka Rida, ka jingkular jong ka ia la ka Niakha ban sa iathuh, ka la pynlynga bad pynpisa mynsiem jur. Ka jingsheptieng, ka jingsngew lem bad ka jingsngew jahburom kine ki la pynpang mynsiem ia ka Rida. Hynrei watla katta, ka la kut jingmut ban iathuh beit kumba ka long.
Haba ka sngi bathymmai ka la wan. Ka jingiakut nia ka Niakha bad la ki khun shaphang la ka khunkha, ki la rai ban pynurlong ha kata hi ka sngi. Mynmiet ka Niakha jar jar ki la leit thiaw sha Jaiaw Shyiap tang bad la u khun heh ar ngut hi. Haba ki la poi ha iing ka Rida. Tok tok, ki la tied, jingkhang bad pyrta de
“Rida, Rida…”
Ka Rida ka la kyndit kumba iuh tdong bsein haba iohsngew ia ka sur ka Niakha.
“Oi, mano ?” Ka la leh myn kylli
“Ma nga plie ka iing..” La jubab ka sur
Ka Rida ka plie wak ia ka jingkhang bad ka shu ong kynsan
“Wa i Niakha phi la wan?” Ka kdup bad doh
“Hooid khun…” La ong ka Niakha
Baroh ar ngut ki la rung shapoh bad ka Rida ka la phah shong ia ki ha kamra shongkai.

“Mei, i Niakha i la wan…” La leit iathuh ka Rida
Kham shiphang wan mih sa ka Kmie ka Rida.
“O Niakha phi wan shane..” Ka la kren bad ka la shongkai lem hangta.
“Hooid, nga da sahnud bad bynnud eh ia ka Khun bad nga la kut jingmut ban wan iasyllok bad ka shaphang kane kaba la jia.” La pynpaw ka Niakha
Ka Kmie ka Rida marsien iohsngew ia kata, ka la kyndeh tur ka shadem. Namar ka sngewthuh ba ka pop kan sa paw noh shen.
“Ka dei kein Niakha. Nga ruh nga da babe jur ia la khun; hynrei yn leh shuh kumno … To ih ka Rida kan sa iathuh hi ha phi.. ” La pynpaw lem ka Kong Maya (Kmie ka Rida )
“Ni phi Nia, phi tip ngi baroh shi iing, ngi da diaw da sngewsih shisha” La ban ktien biang ka Niakha
“Ap Niakha, ngan peit shuwa ki jingshet ” la ong ka Kmie Rida bad ka la ieng nangta joit ban leit sha kamra shet
Ka Rida ka wan mih ryngkat ka sha ba la pynkhreh bad buh ha khmat la ka Niakha bad la u Bakha.
“Ade-de ka jingkloi ne ka khun ban theh sha…” La ong ka Niakha
“Shim Niakha dih noh” La ong pat ka Rida
“To, shong artat hangne khun ba ngin ym miet than, nga la kwah ban iohsngew noh ia kaei ka ba phi la kular ban iathuh ha nga” la ong pat ka Niakha.

Ka Rida ka shong mar pyrshah bad la ka Niakha bad ka sdang ban pynkhih la ka shyntur, ka da nguid um biah ka shu peit sah namar kam lait ban ang.
“Nangta Rida to sdang noh…” La kyntu ka Niakha [yn dang bteng]