BALEI IA NGA

S.K.N

[ba bteng] Ka Rida ka nang pynkhreh pynkhrum ia ka ja na ka bynta la ka Kmie ruh. Haba ka kmie ka la wan ki sa ia bamja lang baroh arngut.
Kumta wat hapdeng ba bamja ia ka phang ba ki iakren kim pynkut.

“Mynta nga sngew eh bha ban rai la ngin ai kam noh ia u Panah jong pha sha ka shnong ne Sengbhalang ruh mano pat kein ban bsa ia ngi? Kane ka bam ka dih katne dei ba wanrah ma u bapli”. La pynpaw ka Kmie
“Hooid kein, baroh kaba jia dei hi namar jong nga. Ngam poi pyrkhat te Mei ban jia kumne. Artat dei namar ba phi hi ruh phim iathiah lang bad i bapli ha kito ki por. Dei ha kito ki por te ba i Panah i khuslai mynsiem bha. Imat i sa lehieid sa snoh bad shoh jingieid ia nga ruh..” Pynpaw sa ka Rida
“Ni ngam tip shuh ta ka daw nga ong. Nga pat ha kato ka por nga mut ba un kylla bamut na kaba leh jan eh tang bad pha namar nga i ha kito ki por ia nga um da niewkor bha shuh hynrei khop khop u snoh bad pha. Pha ruh kawei hi..” La ban ktien biang ka Kmie.

Ha kane ka sngi ki ar ngut shi Kmie shi khun ki poi sha ka ia tih daw bad tei pop iwei ia iwei pat.
Ki sngi ki taiew bad ki bnai ki la nang tyllun. Ka kpoh ba armet ka Rida ruh la nang paw bad ym lah shuh ban buhrieh. Ka Rida naduh ba long kumta ka la rai ruh ban sangeh noh ka leit skul namar la ban ka jinglehrain. Haba dei ba leit jingleit shabar na la iing ruh ka ju da beit ia lade da kaba kup jain tapmoh.

Ki nonghikai ki la lyngngoh bad kylla bna shaphang ka jingpep skul lynter ka Rida na ka paralok ba iajan eh bad ka. Hynrei na ka liang ka paralok ruh ka jubab ba kam ioh jingtip ei ei. Ki Nonghikai ki la kren bynnud ia kata ka jingkylla ba la jia ha ka jingim ka Rida; hynrei ban leit mih sha iing jong ka ruh kim sngew shlan namar ki salia ioh shah kynnoh men lorni.
Hynrei jia ryngkhat ha kawei ka sngi ba iwei i nonghikai iba ithuh ia ka Niakha jong ka Rida, ka la kynduh ha iew ha dukan jong ka. Hangne ita i nonghikai i la ioh jingmut ban kylli pyrthew
“Kong, phi phi dei khun kha ia i Rida ong..?” La kylli i nonghikai
“Hooid, o phi pat kumno phi ithuh ia ka..?” La kylli pat ka Niakha ka Rida
“Nga ithuh ha Kolej..” La iathuh ka Nonghikai
” O phi dei i Miss i Rida …!” La ong pat i Niakha ka Rida
“Hooid Kong” la jubab i Nonghikai
“Nangta kumno i long to i khun kha jong nga. Ngam ioh leit peit shuh ha ka bunkam te phi…” La kylli i Niakha ka Rida
“Nga nang mut ban kylli na phi kein Kong kumno i long mynta i la pep skul la ar bnai ei ei…” La phai ktien i nonghikai
“Kumta seh…?” La kren kyndit sa i Niakha ka Rida.

“Hooid kein… Ni ngi la bunnud bha namar ba i dei ka khynnah bastad ngi la nang khmih lynti shibun kiei kiei na ka bynta ka burom ka Kolej bad wat ka kam ruh lada i iaineh ha ka jingpule..” La pynpaw pat ka Nonghikai
“Ni ko Miss ngam tip khubor ei ei, hooid ka dei ka khynnah bastad bad kaba trei shitom bha.. Hynrei ka sniew bok noh bapli ba la khlad u Kpa uba dei ruh u Hynmen jong nga. Mynta pat ito i Kmie jong ka i la ioh lok thymmai te ngim da kham korbar than shuh. Hynrei mynshuwa wat kane ka dukan ruh ngi ai ha i namar ka dei kaba i Mei i ai pyniaid ha i Bah..” La iathuh bniah i Niakha ka Rida
Ka Miss ka la kyrngah khlieh bad ka ong pat
“Tip shuh kaei kaba jia kumta. Nga nang mut phi tip… ” Ka sangeh noh artat hangta
“To Miss jait ba phi la iathuh kumta khublei shibun ngam leit wad noh ia ka shen shen. Namar nga la kular ba ia ka bai skul jong ka ngan lut hi manga.. Nangta ruh nga kular ban iarap lut kat kiba ka donkam… Hynrei kumno ka shu leh kumta…” La pynpaw biang ka Niakha.

Ki jingtip na ka Nonghikai ki la pynlynga ia ka mynsiem ka Niakha. Shi ban ruh ka la sngew bitar ia ka jingsngap jar ka Rida haduh ban da nud eh ban pep skul noh. Ha kata ka sngi naduh ba ioh ia kata ka khubor ka Niakha ka Rida ka la kut jingmut ban leit wad noh ia la ka khun kha ha ka Robibar ban sa wan. Haba la poi ha iing mynmiet ruh ka la iathuh khana ia kata ha la ka Kmie bad ha la ki khun baroh baroh ki la kwah ban leit peit noh ia la ka Bakha sha iing don ki ba pyrkhat
“Lehse i Pang..” [yn dang bteng]