Balei ia nga?

Khana babteng

Ka jingaimynsiem bad ka jingpynshlur jong ka Kmie, ki Niakha bad ki Nonghikai ka la nang iarap ia ka Rida ban trei shitom shuh shuh. Haba ka eksam ka la poi ka la durut khait bad ka la leh tyn eh shisha kum ba ki nonghikai ki la khmihlynti ia ka. Namar ka jingtrei shitom jong ka kumta kam don por shuh wat ban shet ban tiew, ka Kmie jong ka, ka la hab ban pynkhreh bad pynbiang shuwa na ka bynta la ka khun hadien kata ka sa leit la ka kam dukan sha iew. Hadien ar taiew tam ba ka khun ka la dep eksam ka sa sngew laitluid khyndiat. Kumjuh ruh haba ka Rida ka la ioh shuti ka la leit ban iarap shong dukan bad la ka Kmie ha iew. Ha kawei ka miet hadien ba la wan na iew ka sngew kyndit ba ka Kmie jong ka, ka la kylli ia la ka khun

“Khun phi sngew kumno haba ngi shu ia shong tang kumne ar ngut hi…?” Ka la peit sha la ka khun

“Phi ong kumno kumta Mei..?” La kylli kylla ka Rida

I Kong Maya I la sngew jnang shi rukom ban phai ktien ia la ka khun namar ha la ka dohnud ka la sngew kynjah shibun ban shu shong samla noh khlem Kpa, kam pat sngew lah.

“Em khun nga shu kwah kein ban ioh sngew shi kyntien na phi.. Phi sngew kynjah ne em kumne..?” Ka kylli biang

“Ha nga hi te Mei ngam sngewthuh ia kata namar ba phi dang don ma phi… Balei ngan kynjah..!” La jubab ka Rida. I Kmie ka Rida I sngewthuh ba ym pat lah ban pynsngewthuh ia la ka khun shaphang ka jingmut jong I. Kumta ka khlem bun nia shuh shaphang kata bad ki sdang ban ia bamja noh.

“Imat ka khun bapli kam pat sngewthuh kaei ka ba nga mut…” La kren wei briew I Kong Maya ha la mynsiem.

Hadien ba la shong kai katto katne kynta bad la ka khun ha kata ka miet, ki sa iathiah noh. Ka Rida kam nud ban kylli shai na la ka Kmie; hynrei namar ba ka la don 18 snem ka la don hi khyndiat I jingmut dur ba ioh lehse I Mei jong ka I pyrkhat sha u Panah. Kane ka jingmutdur ka la rung ha ka jingpyrkhat ka Rida.

Katba dang thiah ha kata ka miet ka la don ka jingphohsniew kaba la nang pynskhem shuh shuh ia ka jingmutdur jong ka. Ka la phoh sniew

“Ba u Kpa jong ka u wan bad u syrpai syrpud ia ka … U ong ruh khun, nga sngew synei iaphi namar phin hab shong bad u Panah ..”

Hangta hi ka kyndit noh thred na ba iohthiah. Marsien kyndit nangta ka la kren wei briew

“Kumno kumto… I Pa I wan iathuh ia kaei kumto…?” Ka khapbrip biang ki khmat ban bteng biang ka jingphohsniew hynrei kam wan shuh.

“Imat I Mei I la mut ban ioh Panah noh…” Ka la rung ka jingpyrkhat sniew ha ka. Ha ka step ba bud marsien khie ka la shu leh sngewsih marwei marwei. Haba ka Kmie jong ka, ka la I pher ia ka rukom leh jong ka khun ka la kylli

“Balei jia aiu khun phi leh sngew sih kumne..?

” Em Mei ym lei lei..” La jubab ka Rida

“Wat buhrieh nga la ithuh ba phi leh sngewsih… Phi sngew pang ne …?” Ka Kmie ka la kylli biang

“Em ym lei lei..” La jubab biang ka Rida. Hadien ba kylli bunsien than ka Kmie ka shu ong kynsan

“Phi kein kaei kaba phi kren mynnin..” Ka ong kumne da ka sur ba kham eh.

Marsien ioh sngew ia kata ka ktien na ka khun, I Kong Maya I la sngew dung ngak namar I la pun shisha ka jingmut sniew ha la de.

“Nga leh kumno kein khun..?” La buh jingkylli ka Kmie

“Ngam tip Mei tang ba ka maian ka don hi kaei re kaei kaba sniew na ka liang jong phi… Nga shu sngewthuh ba don eiei ka ban jia ha ka iing jong ngi..” La phai ktien ka Rida

Hadien ba la iakren bun kiei kiei, ka Rida ka la shu sngap noh bad ka la trei la ka kam ka jam. Ha ba la dep bad la ih ka ja ka jyntah kumta ki ia bamja noh baroh arngut shi Kmie shi khun. Ka sngi ka ba ka khun ka la kren ia kiei kiei kiba shon jingmut, ka la ktah ia ka jingmut jingpyrkhat ka Kmie baroh shi sngi. Wat ha dukan ruh ka sur bad ka dur sngew sih ba ka khun ka kren ka la sawa bad iai sawa ha ki tyndong shkor ka Kmie. Hynrei watla katta ruh kam sngew lah ban pyrkhat pat ia lade namar ka jingim jong ka, ka sngewthuh ba kam long ka basuk ban shu shong sah marwei. Haba la wai klas ka Rida ka la wan ha dukan ban iarap kam ia la ka Kmie. Ynda ka rung ha dukan ka iakynduh ia uwei u briew uba shong kai ha dukan bad ka Kmie jong ka. Marsien iohi ia uta u briew ka Rida ka la kynmaw kdar ia ka dur jong uta u briew uba ka la phohsniew mynmiet.

“Khun phi la wan..?” La kren ka Kmie

“Hooid Mei…” La jubab ka Rida ka da shong noh artat

“Kane ka dei ka khun jong nga…” La pynithuh ka Kmie ha uta u Bah

U Bah uba shong hangta, u la ai kti ban khublei ia ka. Kumjuh ka Rida ka la khublei kti ia u.

“Phi la wan klas…? ” u Bah u la kylli

“Hooid ..Mama..” La jubab ka Rida

Ka Rida kam ong eiei shuh shuh bad ka la shu shong khop bad trei la ka kam ban iarap ai jingai ia ki nongthied kiba wan thied jingthied na dukan. Tang kawei ka ba ka sngew diaw ha lade ka long ba ka dur jong u Bah uba don ha dukan ka iohi ba dei uba ka la phohsniew lypa mynmiet.

“Imat I Mei te I la don jingiadei beit bad une u briew..” Ka la puson ha la dohnud.

“Imat kumba nga phoh sniew kan jia beit ba ym slem ngan ioh Panah noh…” La nang mutdur shuh shuh ka Rida

Uta u Bah u la shong kai slem bha hangta ha dukan. Haduh shuwa ban khang u sa mih na dukan bad haba ki la ia khang lynti lynti ka Rida ka kren sngewsih ba imat kan ym lah ban pyndep ia ka jingpule.. Hynrei ka Kmie jong ka pat ka shu sngap kum ka babun jingmut haduh ban da poi ha iing.

Ynda ki la poi ha iing ha kata ka miet ka la mih ka jingiania shiphang hapdeng ka Kmie bad ka Khun namar ka jingiakynduh ia uta u briew. Ka Rida ka iathuh ia ka jingphohsniew jong ka, ba ka la iohi lypa ba uta u briew uba wan kai ha dukan u dei u ban wan sah ha iing lada urlong ka jingphohsniew jong ka. Dei kane ka ba la mih ka jingiapyni nia hapdeng ki shi Kmie shi Khun.

Haba ioh sngew ia kata ka ktien ka khun, la nang pyndom shuh shuh ia ka mynsiem ka Kmie. Ka la kynhed ia ka Rida

“Long pham khein snep shuh ia nga mynta pha la nud ban kren kum kita ki ktien..” Ka la ong

“Em Mei ngam khein poh eiei ia phi, hynrei nga ia thuh ia kaei kaba nga iohi ha ka jingphohsniew ..” La phai ktien pat ka Khun

Ha ba iohi ba ka Kmie ka la dom eh ka Rida ka la sngap noh khlem kren eiei shuh. Kumta watla ka Kmie ka la iai kren da kumne kumtai; hynrei namar ba ka Rida ka la shu sngap ka la shu kut la ka kut noh hi. Dei ha kata ka miet ruh ka sien nyngkong ba ki la bam ja la ka jong ka jong. Hadien ba la dep bam ki la ia leit thiah ruh khlem ia bun nia bun ktien eiei shuh. Ka Rida mynta ka la sngewthuh ia kaei ka ban sa jia bad kaei ka ban sa iakynduh ha ka jingim. Ka la mutdur marwei marwei shaphang kata ka jingim ka ba kan sa dei ban mad ynda la wan sah uta u briew uba kam da itynnat kumba ka iohi ha dukan ka Kmie.

“Imat nga la dei pynban ban mih noh na iing… Uto u briew ngam I mon ba un long u Panah jong nga..” La kren ka Rida marwei marwei

Hynrei haba la shoh ki khmat watla katta ki khia ki jingmut jingpyrkhat ruh ka la iap ioh thiah jak ha ka jingkynoi ka miet.

Haba phai sha ka liang ka jingiadei ka Kmie jong ka bad uta u briew, hadien kata ka sngi ka la nang paw bad nang shai ha ka jingiohi ka Rida. Jan man ka sngi um ju pud ban wan rung ha dukan bad ban shong kai hangta. Ka Rida ka la iohi ruh ba u ju ialeh kumno ban pynjan bad leh ieid iaka da kaba wan rah jingbam phylla bad ai sha ruh haba ka don ha dukan. Kumjuh na ka liang ka Kmie jong ka, ka la sdang ban pynbiej ia ka da ki babun ki jingiasyllok bad pyni ba kan ym sngew pher ia kata namar ba u kpa jong ka um don shuh ha sla pyrthei. Ki sngi ki taiew bad u Bnai uwei hadien uwei pat ki leit bad ki wan. Haba la poi ka ba kut u snem dei ha ka miet snem thymmai ba ka Kmie jong ka, ka la wan ialam sah miet noh ia uta u briew sha iing. Ha kata ka miet ka la long kum ka jingkhawai namar bun jait ki jingbam u paralok ka Kmie jong ka u la wan rah ban ia bam sngewbha. Dei kata ka miet ruh ba u la sah syndon ryngkat bad ka Kmie ka Rida. Kata ka miet wat hapdeng ka jingkmen ban pdiang ia u snem thymmai, hynrei ha ka Rida marwei ka la long ka sngi badum namar mynta ka la hab ban iaid ha ka lynti bathymmai bad uta u Panah uba ka la I ngiew lypa ia u. Hynrei watla katta ia kane ka jingbym sngewtynnat ka la buhrieh tang ha la ka dohnud khlem pynpaw eiei ha la ka Kmie bad ha ki kam ba shabar hakhmat u Panah.