BALEI IA NGA

S.K.N

[ba bteng] ” Hooid, wat khuslai ngin leit noh mynta ka sngi hi mo” la phai ktien u Panah.

Ka Rida ka la ap ia u Panah ha Mahari & Son, Motphran. U Panah ruh namar ba u la tip lypa u la leit beit hangta hi. Haba la iakynduh lang u Panah u la kylli
“Rida shano kumto ngin ia leit shim dawai..?” U peit sha ka
“Ngam da tip, kat shaba ong ma phi…” Ka la phai ktien
U Panah u la pyrkhat shiphang. Kumta u la rai ban leit la ka leit sha uno uno u doctor.

“To ngin ia leit sha u Doctor Dkhar..”
“Hooid ka biang..” La ong ka Rida
Kumta u Panah u la ialam ia ka sha uwei u doctor bym dei khasi namar u kham sngew shngain bad kham sngew shlur, ha Karikhana. Haba la poi ha u Doctor u ruh u la rung lang hapoh.

U doctor u la kylli shaphang ka jingpang jingshitom. Ka Rida ruh ka la iathuh kumba long. Kumta u doctor u la examine bad u la ong
“Ma phi te, sngew kumba la don kato khyllung.. Tangba wat katta ruh, ma phi shim kane jing test ban pyntikna”. La ai u Doctor bad u la batai kumno ban leh. U la ai ruh ryngkat ki katto katne ki dawai ba kan dih.

“Ma phi dei kumno kane..?” La kylli u Doctor ha u Panah
“Dei lok…” La iathuh u Panah
Ka Rida kaba nang iohsngew na kamra examine ka la sngew diaw mynsiem haduh katta katta.

“Ma phi ioh kato ba dang khynnah bha mo..” La biria u doctor.
“He he, hooid kein..” La jubab u Panah ka Rida
Ki mih nangta ryngkat ka jingkhuslai.
“Ngam sngew myntoi shuh ban im hangne ha pyrthei..!” Ong kynsan ka Rida
“Balei..?” La kylli u Panah.

“Ka pap aiu kum kane kaba wan jia ha ka jingim jong nga..” La thnum ka Rida katba dang iaid lynti.
“Wat ong kumta Rida kane ka dei ka bynta jong ka jingim..” La pyntngen u Panah
“Em, ngam lah ban pdiang.. Phi la leh bein ia nga…” La ong pat ka Rida.
U Panah u sngewthuh ba um lah pyntngen hangta ha lynti iaid. Kumta u la wer ia ka ban rung dihsha noh shuwa ha Rice bowl Restaurant ynda la poi ha Motphran. Ka Rida ruh ka la treh bad ki la rung ha ban dihsha hangta. U Panah u la pan da u shaw mar shiteng pliang. Hangne u sdang jai ban pynsngew thuh ia ka. Ka Rida ruh kaba la sngewthuh ba ym don lad shuh ia ka da kumwei pat, nalor ba kam don kamai kajih, ka kmie jong ka ruh, kam don kamai kajih baroh arngut ki la hab ban shu bam na kaba wanrah u Panah ka la hab ban shu sngap.

“Yn leh shuh kumno… Balei ia nga kumne mo phi leh bein..?” La phai ktien ka Rida.
“Ngan ym leh bein ia phi, shu ngeit ia kaei kaba nga ong…” La ong pat u Panah
Hadien ba la dep dihsha bad bam shaw, bran ki ia mih noh nangta. Ka Rida ka la nang leit noh sha iing bad u Panah pat u leit donkam shuwa sha iew.
Marsien poi ha iing, ka Rida ka la leit thiah khop ha nep bad ka iam rangbah da ka jingsngewsih bajur ia kaei kaba ka la tip shaphang ia lade. Ka Kmie jong ka pat watla ka iohi ia kata, ka khlem kylli ei ei. Mynmiet ynda la wan u Panah, u la wan rah ki bam kyrpang ia ka Rida bad ka ruh ka la pynkhreh sha pynkhreh dud ia u.

“Phi sa leh kumba bthah u doctor ho lashai” u Panah u pynkynmaw ba kan test ia lade ban pyntikna da u Pregnancy Test ba la ai u doctor.
“Hooid, nga la kynmaw..” La jubab ka Rida
U Panah u la ialeh shitom da baroh ki lad ki buit ban pynkmen ia ka mynsiem ba la pait ka Rida. U sngewthuh bha ba haduh katno ka long kaba pynsngewsih ia ka. U sngewthuh ruh ba dei tang namar ba ka shaniah bad ka tieng burom ia u ba u sa ioh lad ban iashong lok bad ka. U sngewthuh bha ruh ba ka dei kaba u shu shim kabu na ka jinglui lui jong ka; hynrei ban ym dei kata un nym lah ban ioh lok kum ma ka, kaba dang khynnah, kaba bhabriew, kaba la nang la stad.[yn dang bteng]