BALEI IA NGA

S.K.N

[ba bteng] Ka Rida marsien iohsngew ia kata ka ktien ka la nang khuslai mynsiem.

“Ani! Balei ia nga kumne..?” La mih kynsan ka jingong na ka shyntur ka Rida.

Ka dem ngun bad ka leh sngewsih bha.
Ha kata ka por wan mih i Kmie jong ka.

“Kine te ar ngut ar ngut kumne, Rida khie leit thiah noh..” La kynhed ka Kmie.
Ka Rida ka sngap man man. U Panah u phai ktien
“Balei pha ruh..? Khie leit thiah ngi ba dang ia syaid ding. Long ngi pynwit seh ia pha..” U la ong

“La i salia, ban kumne te bha ba men mih noh nangne na iing. Peit mo ioh poi sha ba eh..” La phai ktien sa ka Kmie ka Rida

“Long balei..?” La buh jingkylli u Panah
“Katta ka miet ban ia shong ar ngut ar ngut kumne te… Kam long ho..” La ong ka Kmie
“Ngi la sngewthuh hi… Khie Kmie nang thiah noh … Nga lei nga dang mut ban dihsha ruh..” La kham kren jem u Panah
Hadien kata ka Kmie ka Rida ruh khlem phai ktien shuh ka shu leit bsut noh sha la jingthiah. Katba ka Rida bad u Panah ki dang bteng ka shong pasiaw hangta. Ka Rida ka la pynpaw hangta

“Lada jia kumba phi ong, ngan leh kumno kein?” Ka la peit sha u
“Rida wat khuslai ia kata. Ha nga lei nga kmen namar nga la shong bad i Mei jong phi hynrei khlem sei soh mynta pat bad phi la mih soh..” La jubab u Panah
“Kata ka bym lah ban long ia nga… Kumno ngan leh pat..?” La kylli biang ka Rida
U Panah u sngewthuh ba kane ka jingjia ka la sdang ban wanrah ia ka jingeh kaba lah ban buh jingma ia ka jingim jong u. U ruh mynta u la khuslai hynrei watla katta ruh u pyrshang hi ban pyntngen ia ka.
“Rida wat khuslai ngan tip ma nga ia phi…” U la ong
“Hu, tip tip…” La thnum ka Rida.

U Panah u la sngew rem ia lade namar kaei kaba jia. U tip ruh ba kata ka dei khlem pep ka dak jong ka jingarmet.
“To Rida ia noh leit thiah noh…” U la wer
Ka Rida kaba la kah da u lyoh ka jingsngewsih ka la pyrkhat ha lade kumno ban leh.
“Ia nang leit thiah phi…” Ka la ong
U Panah u la leit thiah noh marwei.

Kham shiphang hadien kata ka Rida ka sngewthuh ba mynta ka la poi ha ka jingjah burom bakhraw ha ka jingim. Ka mutdur ba lada tip ki Niakha jong ka, lada tip ki nonghikai jong ka, lada tip ki paralok jong ka, khlem pep ki la kyndit bad kynshish ia ka. Kane ka rukom pyrkhat ka la dung kura ha ka mynsiem jong ka bad ka la pyrkhat ban shu leit pynhab noh ia ita i khun ba la don hapoh kpoh. Hynrei ynda ka la pyrkhat bha kam sngew dei. Ynda haba kam lah pyrkhat shuh ia kata ka la iengjoit nangta ban leit thiah noh.
Mynmiet ka la shu thiah khuslai. Hapdeng ka jingthiah ka la phohsniew.
“Ba wan mih u Kpa jong ka ha iing. U la khot ia ka ban leit jingleit bad u. Da ka jingkmen ka Rida ruh ka la khreh la khrum da ki riam baitynnat. U Kpa uba la ap ha phalor u la pyrta wan shi wan noh. Mar iadep riam dep beit ka ruh ka la mih noh nangta ban leit bad u”.

Hamar kata ka por ka shu kyndit noh na ba iohthiah. Hadien kata kam nang shuh ban thiah ka la pyrkhat bad iai pyrkhat ” Hato nga la armet shisha..?” Ka la kylli bad iai kylli wei briew.
Haduh ban da riew u syiar ruh ka khlem ioh thiah haduh ban da shai ka bneng blait. Kumta ruh kam sngew myntoi shuh ban thiah ka khie noh nangta. Ha kata ka jingkhia jingmut ka don tang kawei ka rai bad kata ka long
“Ban wer la u Panah ban leit shim dawai doctor ia ka”.
Kumba ju trei ka trei ka beng bad haba la khie u Panah ha bym don ka Kmie ka la pynpaw ha u ia kata ka jingkwah jong ka. U Panah ruh da kaba kmen u la kohnguh.
” Hooid, wat khuslai ngin leit noh mynta ka sngi hi mo” la phai ktien u Panah. [yn dang bteng]