BALEI IA NGA

S.K.N

[ba bteng] “Phin leit shano pat…?” La buh jingkylli biang ka Rida
“Nga te ngan ym mih hynrei ngan sah beit bad phi..” La jubab u Panah
“To sngap noh phi ioh wan sa i Mei jong phi..” La ong u Panah
Ka Rida ka bym pat ju mad mynno mynno ia kata ka jingjia ka la shu kynmaw beit ia kaei ka ba la jia ia ka ha kata ka miet. Baroh shi sngi ka sngew pher beit ha ka met jong ka.

U Panah ruh ha kata ka sngi u khlem leit jingleit u shong ha iing bad u iarap kam ia ka ha bun ki liang. U Panah naduh kata ka sngi um suk mynsiem kumjuh ruh ka Rida. Hynrei ha la ka jingpyrkhat u la kut jingmut ban shimti beit ia ka Rida jia kat ba jia.

Ka jingsngew lem bad ka jingbymnud ka Rida ban iathuh ia kaei ka ba la jia ha la ka Kmie, ka la pynlong ia u Panah ban nang shim kabu ia ka haduh ba la jan man la ka por u ju bteng ban iai bat bor ia ka haduh bun tylli ki bnai. Hadien lai bnai.

Ym don ba tip ia kaei kaba la jia ha ka jingim ka Rida. Wat ka Kmie ruh kam shym la phohsniew ei ei namar ka jinglong jingman ha iing ha sem ym don jingkylla satia. U Panah ka Rida ruh u stad bha ban buhrieh ia kata namar u ju pynpaw beit tang ka jingleh dom bad atnud kumba la long mynshuwa bad ka Kmie ka Rida. Um ju ktaid ei ei shuh ruh shaphang ka jingieid, hynrei kumba u la ju pynpaw ba u ieng ha ka liang ka Rida, man la ka sngi ruh u leh kumta. Ki jingbam kyrpang bad ki ktien jali jaum u ju pynpaw tang ha ka Rida. Hynrei bad ka Kmie jong ka kaba long ka tnga jong u, u kiar katba lah ban iakren ia ki kam ki jam, siaw siaw u ju iasyllok bad ka Rida. Hooid ka Kmie ka iohi ia kane; hynrei ka ruh kam ju pyni jingkmen ia la u Lok wat bad la ka khun ruh.

Hadien bun ki bnai ka Rida ka sngew pher bha ka met. Kumta ka sdang ban iathuh ha la u Panah. Ka jingsheptieng ka la rung ha ka mynsiem jong ka.
“Pa, nga sngew khia bha ka met… Nga shu sngew tlot sngew swai beit..” La iathuh ka Rida ha la u Panah ha kawei ka miet.

“Kumno phi sngew ..?” La kylli biang u Panah katba ki dang ia syaid ding
“Ngam tip shuh .. Don ka por ba nga sngew kynroi prie.. Nga prie ruh wat ha ba leit klas..” La iathuh ka Rida
“Ade kata te la kut tad, lada long kumta ki ong ka dak armet…” La batai u Panah
Ka Rida marsien iohsngew ia kata ka ktien ka la nang khuslai mynsiem.
“Ani! Balei ia nga kumne..?” La mih kynsan ka jingong na ka shyntur ka Rida.

Ka dem ngun bad ka leh sngewsih bha.
Ha kata ka por wan mih i Kmie jong ka.
“Kine te ar ngut ar ngut kumne, Rida khie leit thiah noh..” La kynhed ka Kmie.
Ka Rida ka sngap man man. U Panah u phai ktien
“Balei pha ruh..? Khie leit thiah ngi ba dang ia syaid ding. Long ngi pynwit seh ia pha..” U la ong
“La i salia, ban kumne te bha ba men mih noh nangne na iing. Peit mo ioh poi sha ba eh..” La phai ktien sa ka Kmie ka Rida
“Long balei..?” La buh jingkylli u Panah
“Katta ka miet ban ia shong ar ngut ar ngut kumne te… Kam long ho..” La ong ka Kmie
“Ngi la sngewthuh hi… Khie Kmie nang thiah noh … Nga lei nga dang mut ban dihsha ruh..” La kham kren jem u Panah
Hadien kata ka Kmie ka Rida ruh khlem phai ktien shuh ka shu leit bsut noh sha la jingthiah. Katba ka Rida bad u Panah ki dang bteng ka shong pasiaw hangta. Ka Rida ka la pynpaw hangta
“Lada jia kumba phi ong, ngan leh kumno kein?” Ka la peit sha u
“Rida wat khuslai ia kata. Ha nga lei nga kmen namar nga la shong bad i Mei jong phi hynrei khlem sei soh mynta pat bad phi la mih soh..” La jubab u Panah
“Kata ka bym lah ban long ia nga… Kumno ngan leh pat..?” La kylli biang ka Rida
U Panah u sngewthuh ba kane ka jingjia ka la sdang ban wanrah ia ka jingeh kaba lah ban buh jingma ia ka jingim jong u. U ruh mynta u la khuslai hynrei watla katta ruh u pyrshang hi ban pyntngen ia ka.

“Rida wat khuslai ngan tip ma nga ia phi…” U la ong
“Hu, tip tip…” La thnum ka Rida. [yn dang bteng]