BALEI IA NGA

S.K.N

[ba bteng] U peit sha bad ka Rida ka shu sngap jar. U Panah um suk mynsiem namar kam kohnguh shai .
“Phi kloi ne em ban kular…? Kular mynta..!” La ong u Panah
“Hooid ..to…” La phai ktien ka Rida
Kumta hi u ieng noh na jaka shong bad u ong artat ia ka ruh
“Ianoh ngin leit noh..” .

Baroh arngut ki ia kam suki jai la ki kjat, ryngkat ka iakren shaphang kata ka sobjek jingieid haduh ban da poi ha Police Bazar. U Panah u ialam rung dihsha ia ka ha Regal Restaurant.
“Phin bam da ei..? La kylli u Panah
“Katba phi bam ngan bam ..” La jubab ka Rida
U Panah u order da u shaw shiteng bad u pan tam pliang kawei ban shu ia sam lang nangta.

“Rida sngewthuh mynta ba nga ieid ia phi da ka jingieid ba janai..” La ong u Panah
U Panah u la thmu lypa ha la ka mynsiem ban ym aili ia ka hynrei ban ioh beit ia ka. Katba u nang peit ia ka katta ruh u nang shoh ieid. Ynda la mih nangta beit ki pynbeit la ka kjat sha iing artat ka bneng ruh ka la jan sa ban kem dum.
Shuwa ban poi ha iing, u Panah u la nang phah leit shuwa noh ia ka Rida shakhmat.

“Khie nang leit shuwa noh maphi sha khmat…” U la ong
“Balei pat…?” La kylli ka Rida
“Shu leit beit seh…. ” u la hukum
“Tieng ia i Mei ne…?” La kylli pat ka Rida
“Em khie shu nang leit…” U la ong biang
Kumta ka Rida kam ong ei ei shuh hynrei ka shu leit la ka leit. Ynda ka la rung ha iing, ka Kmie jong ka, ka la sdang ban tohkit
“Pha wan naei haduh katta por….?” Ka Rida ka la shu sngap …
“Pham don ktien….?” Ka la kynhed biang
Ka Rida ka dang shu sngap beit hi ka leh kum bym ioh sngew…. Kumno kumne mynta kane ka khynnah imat la don kaei re kaei… Katta ka la nang dom.. Ka la kylli biang
“Rida iathuh balei pha slem klass katta…?” Ka la kylli biang
“Ba slem hi te… Wan donkam….” Jubab tang dep ka Rida
Katba ka Kmie Ka nang hylla shaphang ka jingjah slem… Ka da ong artat ap ynda wan u Kpa ngan sa iathuh, ka Rida pat kam salia ka la rkhie pynban bad ong
“Long iathuh ia balei kein….?”

Hamar kata ka por la wan mih u Panah. Kumta hi ka Kmie ka la iathuh wut wut
“Peit kane ka khynnah ruh ka dang wan katta por…” U Panah u la peit sha ka Rida bad u la wiat rymmuin
“O balei pat… Haba slem hi te …” U la ong
“O mynta te mo…. ym long kren shuh… Balei kumne haba ym ju slem shu, kumno kan leit wai klas haduh da miet…?” Ka la phai ktien biang ka Kmie .
“Sngap noh wat hylla than ka Rida ka la sngewthuh hi…” La ong u Panah.
Marsien ong u Panah kumta, ka Kmie ka Rida ka la dom hi ria ka mynsiem…

“To pha la ioh mon mynta ba la don ba kyshan sa ia tip hi shato, ka jot ka bha…. Ngam tip shuh..”
Ka Rida ka la shu peit sha la ka Kmie bad ka la sngew dom lang ; hynrei u Panah pat u la shah sha ka.
“Haba kren Mei da sngewthuh …” La ong ka Rida.
Ha kata ka miet la mih ka jingiania ktien bnum shi bnum… Hynrei ka Rida ka la shu sngap namar ba u Panah u la nang kyrshan bad iakren na ka bynta jong ka. Ka jingiania na ka bynta ka Rida, ka la pynmih ka jingiadom jong ka Kmie jong ka bad u Kpa jong ka haduh ba ha kata ka miet u Kpa u khlem leit thiah lang shuh kumba ju long. Ka Rida pat ka la don ka jingsngew sheptieng ia lade namar ka tip ba kaei kaei ka bajia baroh; ka dei namar u Panah hi. Ha kata ka miet ka la shu thiah rit mynsiem watla ka don ha la kamra. [yn dang bteng]