BALEI IA NGA

S.K.N

[ba bteng] Kumta katba dang ia bun ktien hadien ba la wai eksam don tang iwei i paralok iba la biria bad ong
“Ri, peit mo tangba ka ma lada leh ieid u Panah ioh ba shah ih i Mei….” Ka ong bad ka rkhie artat..

Hangta ki iarkhie shaid ba sngew dei palat kata ka ktien..
“Dei mo… Ani ka ma shisha lada long kumta… Hooid kein ani lada u leh ieid than ioh u mon baroh…” La bynrap lem sa ka Rida
Ki ktien jong ka paralok ki la sdang rung shisha hapoh ka dohnud jong ka Rida.. Suki suki ynda la poi ha iing ka la nang pyrkhat ia kata ka jingong… Haba la wan u Panah u la wanrah soh kreb bad ki biskit ban dihsha ka Rida..

“Shim khun kine nga la wan thied ban phin bam ba phin peit mat haba khreh kot… ” U leit rah ha khmat jong ka..
“To khublei shibun…” La ong ka Rida
Hadien ba la dep bamja katba dang khreh kot ka Rida ka la kum pyrkhat shisha ia ka jingkren ka paralok ba lehse u ieid ne u mon ia ka. Haba la wan kane ka jingpyrkhat ka la pynsheptieng ia ka Rida.. Hynrei kam lah sngewthuh bad mutdur namar ba kumno kata kan jia haba ka Kmie jong ka, ka don beit ha iing… Kumta ka pynkut nia ba jia katba jia ym lei lei… Ka la pynleit jingmut beit tang sha la ka eksam ba dang sah…
Katba ka Rida ka dang bteng ban thoh eksam u Panah ruh man ka sngi thop shi thop u leit ban pyn on lynti bad ka ryngkat ki ktien kitbok ba kan lah thoh bha.

Hadien ba la kut ka eksam Ka Rida ka la sngew laitluid war bad hadien lai sngi ka sa leit mih kai sha dukan ka Niakha…
“Ani Khun phi la wan….?” La ong ka Niakha
“Hooid Niakha…” La jubab ka Rida
“Nangta phi la kut eksam ong….?” La buh jingkylli ka Niakha
“Hooid… Dang ar sngi mynshuwa Niakha…” La phai ktien ka Rida
“O kumta mo… Nangta phi sngew lah Khun…?” La buh jingkylli biang ka Niakha
“Shu biang hi…” La jubab ka Rida
“Don bok Khun phin ioh pas bha…” La kit bok ka Niakha
“Hooid kein Niakha….duwai lem ba ngan iai pas bha…” La bynrap ktien ka Rida
Hadien ba la shong kai slem bha bad ka iarap kam ia la ka Niakha ka sa mih nangta haduh ka por prem miet artat. Katba ka dang iaid thop shi thop kumne marwei marwei ka kyndit ban iohsngew ba la don ba thab na met bad ong
“Are dang wan nangno kumne….?” Ka Rida ka phai wak bad ka iohi da i Panah lajong
“Adi i Pa, phi dang wan…!” La ong sa ka Rida
“Phi wan naei i Rida…” La kylli bniah u Panah
“Nga wan na dukan Niakha…” La iathuh hok ka Rida
“O phi miet pat…” U pynbud da ka ktien bajem
“Hooid kein namar i phah iarap kam ruh…” La iathuh ka Rida
“O biang kein…” La bynrap ktien u Panah
Ki ia iaid lang arngut arngut haduh ban da poi ha iing… Ynda la poi ha iing i Kmie Ka Rida i la kren dom
“Shano kumne phi ia wan arngut arngut… ” bad ka peit da ka khmat baheh sha ka Rida
“Pham tip kam tip jam shuh pha wan nangno kumne. .” i la nang kren dukhi
“Nga wan kai na dukan i Niakha…” La jubab rit sur ka Rida
“Nga kynduh ha lynti iaid ba ka wan kai na la ka Niakha …” La kem ktien noh u Panah
“Shet sha Rida ngin ia dih shuwa da i sha … Don ne u jingbam nga la wan rah…” La ong u Panah
Ka Rida kam sheptieng shuh watla kren dom ka Kmie namar ba la kren jem u Panah bad ka pynstet la ki kti ban shet sha.. Ka Kmie Ka Rida ha la dohnud Ka la nang dom hynrei kam nud namar ka iohi ia ka khmat u Panah ba u iashah sha ka Rida. Ha la mynsiem ka la sdang ban sma sniew…[yn dang bteng]