BALEI IA NGA

S.K.N

[ba bteng]Ka mynsiem jong ka la noh shiliang ha ka barieh u ieid ia ka Rida bad ha ka ba paw pat u leh kumba ieid ia ka Kmie jong ka.

Ki sngi ki por ki la nang iaid stet, kiei kiei ki barieh kiba don hapoh ka dohnud u Panah ka Rida ki la nang san bad nang heh. U sdang ban ialam iew ialam hat hi ia ka bad haba u ialam u da tyrwa sbun mynsiem ba kan ong lada don ei ei ba ka kwah ban thied.

Ka Rida ka la sngew kmen shikatdei eh namar mynta ka la iohi ia ka jingkylla mynsiem jong u Panah. Suki suki u sdang ban kham pynlaitluid ruh ia ka ha ka leit ka wan, tangba u maham pat ba kan ym pat dei ban ialang samla namar ba dang don ha jingpule. Ka Rida ruh ka la sngew dei bha ia kata ka jinghikai u Panah. Ka la pyrshang ban kohnguh ia kata. Mynshuwa hooid ka isih bha ia u; hynrei mynta ka la sdang ban ieid ia u. Ka daw ka long ba u lah u iai ia ka. Haba la poi ka por eksam ka Rida ka la iathuh ha la la Kmie, ka Kmie ka la iathuh ha u Panah bad marsien tip ia kata u Panah u la wan thied da u complan ba kan dih bad um ju pynthut shuh ia ka ha ka kam ka jam u bthah wat ia ka Kmie jong ka ban kham ailad ba kan khreh kot.
“Kmie ka Ri haba ka khun ka don hapdeng ka eksam phim dei ban pynkhia kam shuh ia ka, namar phi la tip hi ba katno ka kolej bad ma ka kumjuh ma ngi ruh ngi khmih lynti ba kan khur bha ha kaba wan sha khmat…” La ong u Panah ha i Kmie ka Rida
Mynta ka mynsiem ka Rida ka la kmen shisha ia ka jingsngewthuh bad kylla bamut u Panah ban ieid ia ka.
Ha kawei ka miet katba dang ia shongkai harud ding u Panah u la pynpaw
“Ri nga la ieid ia phi kum la ka khun lajong… Ngam sngew pher ei ei … Phi ruh wat sngew nongwei ei ei ia nga hynrei ong beit kano kano kaba phi donkam ia kaba nga lah ngan ai na ka bynta jong phi…” La kular u Panah ha khmat ka Kmie jong ka.

“Hooid to Panah..” La kohnguh ka Rida
Ka jingkylla kaba la jia ha ka jingim u Panah ka la nang pynshngain ia ka jingim ka Rida. Ka bapli ka Rida kam tip ei ei ia kaba shapoh u Panah. Kumta haba la poi ka por eksam ruh u Panah u la sdang ban leit on lynti ia ka bad ka kitbok kit rwiang ba kan lah thoh bha. Kane ka dur ba u pynpaw ka la nang pynieid bad nang pynjan shibun eh ia ka jingiadei hapdeng ka Rida bad la u Panah.

Mynta ka mynsiem ka Rida ka la dap da ka jingsngew kmen shibun haba ka iohi ia ka jingphikir jong u Panah ia ka. Kiwei ki paralok jong ka ruh kiba ka iajan bha ki la sdang ban iaroh ia ka jingbha u Panah ka Rida.
“I Panah jong phi i best bha imat… I leh la kum ka khun lajong mo iaphi…” La ong ka paralok katba dang ia iaid lynti
“Hooid kein mynta i sdang ieid bha ia nga .. Nga ruh nga la kham sngew tynnat ia i mynta…” La phai ktien ka Rida bad ka rymmuin
Kumta katba dang ia bun ktien hadien ba la wai eksam don tang iwei i paralok iba la biria bad ong
“Ri, peit mo tangba ka ma lada leh ieid u Panah ioh ba shah ih i Mei….” Ka ong bad ka rkhie artat..
Hangta ki iarkhie shaid ba sngew dei palat kata ka ktien..
“Dei mo… Ani ka ma shisha lada long kumta… Hooid kein ani lada u leh ieid than ioh u mon baroh…” La bynrap lem sa ka Rida
Ki ktien jong ka paralok ki la sdang rung shisha hapoh ka dohnud jong ka Rida.. Suki suki ynda la poi ha iing ka la nang pyrkhat ia kata ka jingong… Haba la wan u Panah u la wanrah soh kreb bad ki biskit ban dihsha ka Rida..
“Shim khun kine nga la wan thied ban phin bam ba phin peit mat haba khreh kot… ” U leit rah ha khmat jong ka..
“To khublei shibun…” La ong ka Rida
Hadien ba la dep bamja katba dang khreh kot ka Rida ka la kum pyrkhat shisha ia ka jingkren ka paralok ba lehse u ieid ne u mon ia ka. Haba la wan kane ka jingpyrkhat ka la pynsheptieng ia ka Rida.. Hynrei kam lah sngewthuh bad mutdur namar ba kumno kata kan jia haba ka Kmie jong ka, ka don beit ha iing… Kumta ka pynkut nia ba jia katba jia ym lei lei… Ka la pynleit jingmut beit tang sha la ka eksam ba dang sah…
Katba ka Rida ka dang bteng ban thoh eksam u Panah ruh man ka sngi thop shi thop u leit ban pyn on lynti bad ka ryngkat ki ktien kitbok ba kan lah thoh bha .. [yn dang bteng]