S.K.N
[ba bteng]Kam nud ban mih na Synod Kolej namar ba ka kolej lyngba u Prinsipal bad ki nonghikai ki la ai sngewbha ia ka da ka song pisa baheh kaba la dap ia ka ar snem pule namar ka jingioh khur lahduh jong ka ha baroh ki sobjek ha uta u snem. Kumta kane ka jingleh ka kolej ka la bat ia ka jingmut jingpyrkhat jong ka ban bteng beit hajuh. Ka jingwan shakhmat ka Rida ka la rah ia ka burom ka kolej bad ruh ka la paw ha ki kot khubor. Baroh ki briew kiba pule kot khubor ki la iohi ia ka dur jong ka ha kot khubor bad ia ki jingkhur mak jong ka. Haba kane ka la jia ha ka jingim jong ka, ka la pynkmen shi katdei eh ia ka bad ia ka Kmie kumjuh ka Niakha jong ka.
Thop shi thop ka Rida ka tista bha ka leit klas, hynrei teng khat eh ka poi sha Iew ban iakynduh la ka Niakha kaba kyrshan ia ka. Ka daw ka long namar ba ka Kmie bad u Panah jong ka kim ailad ia ka. Don ka por ba ka la thmu ha la mynsiem ban mih noh na iing bad leit sah bad la ka Niakha hynrei ynda ka la pyrkhat bha, kam sngew dei namar ka iing dei kaba la shna u Kpa jong ka hi bad ka sngew long trai halor jong ka. Kumta ka kut jingmut ban iai shah bad ban shu leh sianti bha ia lade.
Ka dur ba bhabriew jong ka lymphuin bad ka met ba wan dur jong ka, ka la khring bha ia u Panah jong ka uba don ha iing bad uba iohi ia ka miet la bad sngi. Katba nang iaid ki sngi kumba ju leh u ju pyndonkam ia ka ha kaba phah sait jain, ha ka ba phah kyllan dawai ruh teng teng ia la ka met wat haba don ka Kmie jong ka, da kaba iaroh ba ka don sap bad sngew jem bha. Kumta ka Rida kam banse ban leh namar lada kam leh kan shah mai ha ka Kmie jong ka kumjuh ruh u Panah un dom. Ka sheptieng bha ia kane. Ha kawei ka miet katba ka Rida ka dang sum u Panah jong ka u nang peit tuh na shiliang kamra na i thliew ba pei ka lyntang iing. Ka Rida bapli kam tip ei ei ia kata katba u Panah u la dep tip lut bad iohi lut ia ka met jong ka. Ka jingiohi kumta ka la nang khring bad pynshoh ia ki khmat u Panah ban sngew shlur ha kaba ktah ia ka met ka phad jong ka teng teng wat haba don ka Kmie jong ka. Naduh kane ka por u Panah u la thmu sniew ia ka ban ioh pynjot bad u la buhrieh ia kane ha la ka mynsiem.
Kumta u la pyrshang ban leh bha leh sbun ia ka Rida da ka ba thied ki jain ki nep jong ka bad ka bam bang na ka bynta jong ka. Ka mynsiem jong ka la noh shiliang ha ka barieh u ieid ia ka Rida bad ha ka ba paw pat u leh kumba ieid ia ka Kmie jong ka.
Ki sngi ki por ki la nang iaid stet, kiei kiei ki barieh kiba don hapoh ka dohnud u Panah ka Rida ki la nang san bad nang heh. U sdang ban ialam iew ialam hat hi ia ka bad haba u ialam u da tyrwa sbun mynsiem ba kan ong lada don ei ei ba ka kwah ban thied.
Ka Rida ka la sngew kmen shikatdei eh namar mynta ka la iohi ia ka jingkylla mynsiem jong u Panah. Suki suki u sdang ban kham pynlaitluid ruh ia ka ha ka leit ka wan, tangba u maham pat ba kan ym pat dei ban ialang samla namar ba dang don ha jingpule. Ka Rida ruh ka la sngew dei bha ia kata ka jinghikai u Panah. Ka la pyrshang ban kohnguh ia kata. Mynshuwa hooid ka isih bha ia u; hynrei mynta ka la sdang ban ieid ia u. Ka daw ka long ba u lah u iai ia ka. Haba la poi ka por eksam ka Rida ka la iathuh ha la la Kmie, ka Kmie ka la iathuh ha u Panah bad marsien tip ia kata u Panah u la wan thied da u complan ba kan dih bad um ju pynthut shuh ia ka ha ka kam ka jam u bthah wat ia ka Kmie jong ka ban kham ailad ba kan khreh kot.
“Kmie ka Ri haba ka khun ka don hapdeng ka eksam phim dei ban pynkhia kam shuh ia ka, namar phi la tip hi ba katno ka kolej bad ma ka kumjuh ma ngi ruh ngi khmih lynti ba kan khur bha ha kaba wan sha khmat…” La ong u Panah ha i Kmie ka Rida
Mynta ka mynsiem ka Rida ka la kmen shisha ia ka jingsngewthuh bad kylla bamut u Panah ban ieid ia ka.
Ha kawei ka miet katba dang ia shongkai harud ding u Panah u la pynpaw
“Ri nga la ieid ia phi kum la ka khun lajong… Ngam sngew pher ei ei … Phi ruh wat sngew nongwei ei ei ia nga hynrei ong beit kano kano kaba phi donkam ia kaba nga lah ngan ai na ka bynta jong phi…” La kular u Panah ha khmat ka Kmie jong ka.
“Hooid to Panah..” La kohnguh ka Rida
Ka jingkylla kaba la jia ha ka jingim u Panah ka la nang pynshngain ia ka jingim ka Rida. Ka bapli ka Rida kam tip ei ei ia kaba shapoh u Panah. Kumta haba la poi ka por eksam ruh u Panah u la sdang ban leit on lynti ia ka bad ka kitbok kit rwiang ba kan lah thoh bha. Kane ka dur ba u pynpaw ka la nang pynieid bad nang pynjan shibun eh ia ka jingiadei hapdeng ka Rida bad la u Panah. [yn dang bteng]
Phi don ban ong eiei?