BALEI IA NGA

S.K.N

[ba bteng] I Niakha ruh namar i don beit marwei i la ailad ia ka ban trei katba ka mon. Ynda haba ym don nongthied i Niakha i la sdang ban kylli mian mian na ka shaphang kaei kaba jia ba kam ju poi wan mih shuh sha iing ne sha dukan. Haba la kylli ka Niakha ka Rida ruh ka sdang ban iathuh kumba ka dei ban iathuh baroh.

“Haduh katta khun… Ani! ka jingsniew mynsiem ito i Kmie jong phi pleng.. Tangba lah dei ruh na uto u Panah uba nang pynshoi..” La ong ka Niakha
“Ka lah ban dei Niakha namar ha kato Ka sngi bad nga wan wad ia phi shane u Panah u iohi ia nga…u sa iathuh ha i Mei..” La ban ktien biang Ka Rida
“To mynta nga la sngewthuh… Phi wat sheptieng Khun ngin ia leh noh kumne ..” La ong Ka Niakha.
“Phi ynda la poi ha iing lada jia ba i Mei i kylli phi wan na ei, iathuh beit ba phi wan iakynduh ia nga…” La ai jingmut i Niakha
Ka Rida ka la da sngew kmen eh haba ka iohsngew ia kita ki ktien na la ka Niakha.
“To Niakha….” Ka la jubab
Kumta hadien shiphang por ka sa mih noh nangta ban leit phai sha la iing. I Niakha jong ka i la pyn rah rneng de ia ka katto katne ki jingbam. Haba la poi ha iing ka la kem sheptieng ioh ba kan shah mai.. Hynrei watla katta ruh ka pynshlur la ka mynsiem kum ka bym riej ei ei.
“Pha wan nangno katta por….?” La byrthen shisha ka Kmie jong ka marsien rung ha iing.
“Nga wan na iew…” La jubab ka Rida
“O baroh shisngi pha leit aiu shata…?” La kylli biang ka Kmie jong ka da ka sur ba khor
Ka Rida ka shu sngap shiphang khlem jubab .
“Jubab ym don ktien ne pha leit leh aiu shata…?” La ban biang ka Kmie
“Nga shongkai dukan i Niakha…” La jubab ka Rida
“Pham tip por shuh… Leit shongkai baroh shi sngi…” La nang kren khor biang ka Kmie
Hamar kata ka por wan mih u Panah..
“O balei kumne phi shu ia ieng baroh arngut…?” U la kylli
“Kane ka dang shu wan iing kumne hi…” La iathuh ka Kmie ha u Panah
“Ow ka eh … Nga la iohi mynne ha iew….” La phai ktien u Panah
“Ka shong hangto ha dukan baroh shi sngi i kumba ki iathuh khana bun kiei kiei…” La iathuh biang u Panah
“Long pha la thad lut la ka iing ka sem ha iew….?” La buh jingkylli biang ka Kmie
Hangta ka Rida kam nang jubab ei ei shuh namar baroh arngut ki la ia soh lang ban mai ia ka. Hadien ba kam jubab shuh ka Kmie jong ka, ka la nang dom bluit ka mih na iing ka leit sei ia uwei u dieng kper syntiew bad wan rung biang ha iing hangta khlem kren shuh ka shu bom beit la ki la ka khlem sngap shuh ia ka jingpanmab ka khun. Ka Rida ka la pang jur bad at dieng lut ki khohwah ki kti bad katto katne ruh na ki bynta ka tdong bad lbong.. Kumta hi kam nang shuh ban bam ja bad dihsha ruh, bak ka rung beit ha la kamra thiah jlang ka bsuh hapoh ka nep.
Kane ka jingjia ka la pynsngewsih shibun eh ia ka Rida. Ka la kum pyrkhat
“Balei i Mei i long haduh katne..?”
Watla ka thngan hynrei ym don ba patiaw shaphang jong ka. Kane ka la nang pynsheptieng jur ia ka mynsiem jong ka ioh ba u Panah un shim kabu. Kam nang iohthiah ha kata ka miet baroh shimiet haduh ban da shai bloit.
Dang step phyrngap ka Kmie jong ka, ka la wan kyrsiew ban khie noh. Kumta ka la hab ban leh kumba ka ong. Ka hab ban trei ban ktah bad ban pynkhreh sha ia la ka Kmie bad ia la u Panah. Hadien ka dih sa ia lade.
Ha kata ka step ka Kmie ka la maham ba kam bit shuh ban mih na iing ha kata ka sngi. U Panah ruh u iohsngew ia kata bad u la mynjur lem.
Shi taiew kynthih ka Rida kam ioh lad shuh ban mih. I Niakha jong ka i la lyngngoh ba ka Rida kam wan mih shuh. Hynrei dei tad haduh ba poi ka sngi ba ka dei ban leit sha klas ba ka sa ioh lad ban leit kynduh biang bad la ka Niakha. [yn dang bteng]