Shillong, 16’lyngkot:
Mynta ka miet ka la don ka jingialang jong ki MDC ka PDF ba kynthup naduh ki MDC shimet, ki MDC ka HSPDP, MDC ka UDP, NCP, KHNAM bad BJP. Hadien ba la wai katei ka jingialang haba kren sha ki nongthoh-khubor u Chief Executive Member ka KHADC u bah Pynshngaiñ N Syiem u la ong ba ha katei ka jingialang la shim ia ka rai ba ka KHADC kan leit ban ujor da ka jingujor kaba thymmai sha ka Meghalaya High Court halor ka jingwan kyntur pud ka MUDA sha ki jaka ba hap hapoh ka jingpeit jong ka KHADC.
U bah Pynshngaiñ u la ong ba ka jingwan kyntur pud ka MUDA ka la pynjynjar ia ki paidbah nongshong shnong naba ki donkam ban ioh jingbit na ka haba ki shna ing thymmai bad lada khlem da ioh jingbit na ka MUDA kin ym ioh tan um bam umdih ha ing bad kin ym ioh ring bording ilektrik ruh ha ing jong ki naba kitei ki tnad ba peit ki pan shuwa ia ka jingbit na ka MUDA shuwa ban ai.U la ong ba ka KHADC ka pyrkhat ba kan bha ba kin phah da ka jingujor ba thymmai ba kan kham sted ban ia kaba iaid lang bad ka mukotduma jong u bah Tirot Sing pyrshah ia ka sorkar.
La kylli na u CEM kaei ka jingmih na ka jingialang kaba ki la ia kynduh ia u myntri rangbah ka jylla ha ki khyndiat bnai ba la dep, u CEM u la jubab ba ha katei ka jingiakynduh bad u myntri rangbah ka sorkar ka la kam ba ka don ia ki rikod ba ka jingwan tur jong ka MUDA ka dei kaba la ioh jingbit na ka District Council, hynrei u la ong pat ba haduh mynta ka sorkar kam pat lah ban sei ia kita ki rikod kiba ka la kam ba ka don. Shuh shuh u la iathuh ba kawei pat ka bynta ba la rai ha katei ka jingialang ka long ba ka KHADc kan phah jingpynkynmaw biang sha u Lat ka jylla halor ka jingsahkut ka Village Administration Bill (VAB) bad ia katei ka jingpynkynmaw u la ong ba yn phah kopi sha ka sorkar jylla. U la ong ruh ba ka District Council kan pan jingshai na ka sorkar jylla ha kano ka nongrim ba ka la ai jingmut ia u Lat ban phah ia ka VAB sha ka Ministry of Home Affairs ka sorkar India.
Phi don ban ong eiei?