Balang kam lah ban ai jingim

Jingmih kynhun balang bunjait,
Longïing longsem pynjot pynpait;
Na daw balang ki ïakajia,
Ia jaitbynriew ruh pynpharia.

Ngam beiñ ngam khoh balang kiwei,
Namar baroh ngi shakri Blei;
Baroh hikai ïa ka jingbha,
Baroh hikai ïa jingshisha.

Kaei patde kaba pynsniew,
Ka dei ka jingsarong ki briew;
Bapli ki sngew kumba tip lut,
Hynrei kim tip ka sdang ka kut.

Hana “Balang jong ngi ka hok,
Balang kiwei ïalam dujok”;
Hato phi lah ban pynshisha,
Haba phi nud ban kren kumta?

Wat kloi bishar tang ïa kiwei,
Namar phi ruh phim dei U Blei;
Ha sla pyrthei ym don ba hok,
Da ngim kylla ngin poi dujok.

Da ka mynsiem kaba sngewkhia,
Nga hap ban kren ïa jingshisha;
Balang kam lah ban ai jingim,
Nga kren ïa ka naduh mynsiem.

U Blei Un nym kylli ia ngi,
“Kaei kynhun balang jong phi?”;
Jingkwah jong U kadei ka hok,
Ba ngin ioh lait na ka dujok.

To bret ïa jingsngewhok na phi,
Ioh long pynban kum pharisi;
Pynbeit la ka lynti sh’U Trai,
Phin long ki khun jong ka jingshai.

(Da u samla Hopestarwell Snaitang, Seiñduli II, WKHD.)