Bakla por ba ioh ka Meghalaya ia ka PO 1950, ong u bah Pynshngain

Shillong: U chairman ka Khasi Hills Autonomous District Council (KHADC) u bah Pynshngain N Syiem u la ong ba ka jingneh ka thup kyrteng jong kiwei ki riewlum ne schedule Caste/Tribes nalor ki Khasi, Jaintia bad Garo ha kane ka jylla, ka dei namar ba la bakla ban dawa ban pynbeit ia ka Presidential Order (PO) 1950 ha ka por ba ioh ia ka jylla Meghalaya.

Haba kren sha ki lad pathai khubor myn hynnin ka sngi, u bah Pynshngain u la ong ban pynkylla ia kane ka Presidential Order 1950, ka donkam ban leh da ka parliament lyngba ka sorkar pdeng ban pynbeit ia kane.
“Ka jingbakla halor kane ka dei namar ba bakla ha ka por ba ioh ia ka jylla ban pynkylla ia ka presidential order 1950 ba la phiah ia ka Meghalaya katkum ka North East Re-organisation Act 1971”, la ong u bah Pynshngain.
Kumba ka long haduh mynta ki don haduh palat 50 tylli ki riewlum kiba la don ha ka thup ka Presidential Order 1950 kaba treikam ruh ha kane ka jylla Meghalaya namar ba la shu shim na ka Assam ha katei ka por.
Ka la don ka jingiakhih ban dawa ban weng noh ia kine ki riewlum ban ithuh ha kane ka jylla namar ba kin knieh lut ia ki bhah ki bynta jong ki Khasi, Jaintia bad Garo kiba dei ki trai shnong.
U bah Pynshngain u la ong ba ka sorkar jylla, bad ka District Council kim lah leh eiei ban weng ia ki lait noh tang ban shu ai da ka jingthoh khnang ba ka sorkar pdeng kan leh ia kane.
“Ha ka jingshisha ka la dei ha kato ka por ba la ioh ia ka jylla Meghalaya ban dawa ban pynkylla ia ka Presidential Order kaba la phiah na ka Assam lyngba ka Nort East Reorganisation Act 1971”, la bynrap u bah Pynshngain.
Katkum ka jingong u bah Pynshngain ka jingioh jylla ia ka Meghalaya ka long ban pyntreikam na ka bynta ka jingbit jingbiang ki trai jaka hynrei ka la don ka jingeh namar ba ia kane khlem pynbeit ha katei ka por.
Ka KHADC ka la pyrshah ia ka jingbsuh ia ka kyntien ban ailad ia kiwei ki jaitbynriew riewlum ne unrepresented tribes ha ka Territorial Autonomous Council kaba dang iaid ha ka jingpynkhreh ka sorkar pdeng ban pynkylla ia ka Sixth Schedule ka Riti Synshar ka ri mynta, namar ba la thaw ia ka KHADC tang na ka bynta ki Khasi, ka JHADC ia ki Jaintia bad ka GHADC ia ki Garo, ym ia kiwei ki jaitbynriew.