Bakla ka jing shim kyrteng NRC ha Assam, hap leh biang, ong U Himanta Sarma

Guwahati:
U Himanta Biswa Sarma, myntri ka sorkar Assam, ula ong mynta ka sngi, ba ka jing pyntrei kam ia ka National Registration Certificate (NRC), ka dei kaba bakla bad ula ong ka sorkar Assam, kan sa pynlong biang da kawei pat ka jingshim jingkhein NRC, hadien ka elek shon 2021, lada jia ba ka shah ka Supreme Court.

Ka National Register of Citizens (NRC), la pynmih ha U Nailar 2019, lyngba ka jingpeit bniah jong ka Supreme Court bad ha katei ka jing pynrung kyrteng, la weng ia 19 ngut ki briew.

U Sarma, haba iakren ia ki kotkhubor, u iathuh ba U Prateek Hajela, uba pyniaid ia ka khana samari jong ka NRC, ula leh bakla shibun eh halor ka jingshim kyrteng ia ka NRC.

Ha u snem ba ladep, ka Supreme Court, ka la kynriah kam noh ia U Hajela sha Madhya Pradesh. U Sarma, u ong shuh shuh ba ka nuksa jong ka jingtrei kam jong Hajela, ka long ba u nongtuh, ula ioh ban rung ialade sha ka kam pulit bad kumta, ula leh ia ka kam kaba bakla suda.

U Sarma, ula ong biang ba ka sorkar BJP, ka la pan jingbit na ka Supreme Court, ba kan peit biang ia ki kyrteng jong kito kiba la dep weng na ka NRC bad kitei ki kynthup ia ki 20 percent kiba don ha ki district khappud jong ka Jylla.

U Sarma, u ong shuh shuh ba ki don ki Mughal kiba thymmai ha kine ki sngi ha Assam, kiba hap ban iakhun tyngeh pyrshah ia ki, tangba U Sarma, um shym la batai satia ia kaei ka jingmut, jong ka kyntien ‘modern Mughal’ lane ki Mughal kiba thymmai.