Bak her U CEM ka KHADC sha Delhi rNamar ka Village Administration Bill

Shillong, 26 Jymmang:
Katba ki seng riew lum ha kane ka jylla ki dang ia khih ia ksaid ban pynbor ia ka sorkar jylla ba kan mynjur noh ia ka Village Administration Bill, u CEM ka KHADC u bah Pyn shngain N Syiem pat mynta ka sngi u la her bak sha nongbah Delhi ban leit ia kynduh ia ki heh Congress ka AICC ban ia kren ia katei ka bill namar ka jingbym patiaw ka sorkar jylla.Ia katei ka jingleit Delhi u bah Pynshngain la pyntip lyngba ka kyrwoh na u Md. Azeem Personal Assistant u ma Vincent Pala, MP ka Lok Sabha na Shillong.
Ka jingleit Delhi kynsan u CEM ka la pynlyngngoh bad ka la pynmih ka jingsuba ba ka don ka jingbym ia sngew thuh jingmut hapoh ka seng Congress namar ba kumba ka paw la iohi ba ha ka sorkar jylla kaba la synshar da ka seng Congress, u khliehduh jong ka KHADC uba dei hi na ka seng Congress um shym la lah ban pynkohnguh ia ka sorkar bad dalade hi u la her bak sha Delhi.
Shuh shuh naduh kaba sdang ka jingiapynkhyllem EC ha KHADC ha kine ki sngi ba la dep la iohi ba u myntri sorkar ba peit ia ka tnad DCA u bah HDR Lyngdoh u ju don ryngkat ryngkat ha syndah u bah Pynshngain, hynrei mynta pat haba u bah Syiem u la wan ha ka bor la iohi ba u myntri DCA um donbor shuh ban tuklar ia ka tnad ba u bat. Ki lad khubor ki la iathuh ba katei ka jingleit Delhi u bah Pynshngain ka dei hadien ka jingiasyllok bad katto katne ngut ki myntri sorkar bad kumjuh ruh ki nongialam Congress.
U Chief Executive Member ka Khasi Hills Autonomous district Councicl u bah Pynshngain N syiem myngta ka sngi u la her sha Delhi ban leit ia kynduh ia ki heh Congress bad ki nongialam ka AICC ban ia kren halor ka Village Administration Bill. La synran ia u bah Syiem da u bah Neil Antonio War, EM, uba dei ruh u MDC ka Laitumkhrah. Katei ka jingleit Delhi kyrkieh jong u bah Syiem ka dei hadien ba ka sorkar jylla kam patiaw eiei halor katei ka bill kaba haduh mynta kam shym la pynpoi ha kti u Lat ka jylla.
U bah Syiem u la leit ia kynduh ia u General Secretary AICC in charge ka jylla Meghalaya u V. Narayanasamy ba un leh eiei noh halor katei ka Bill ban pynbor ia ka sorkar ba kan phah sha u Lat ka jylla, ha kaba u Narayanasamy u la kular ban pynpoi ia ka jingthoh sha ka Sonia Gandhi, bad na ka liang utei u nongialam ka AICC u la thoh ruh sha u Myntri rangbah ban pynkloi ia katei ka Bill.
Ha katei ka jingleit Delhi u bah Pynshngain u la ia kynduh ruh ia kiwei pat ki nongialam ka seng Congress AICC ban kren halor katei ka bill bad ban batai ia ka jingeh ki Rangbah Shnong ha kine ki sngi.