New Delhi: U myntri ka tnad kam pohing jong ka sorkar India u Rajnath Singh mynta ka sngi u la leit sha Srinagar ban ia don bynta lang ha ka jingleh burom khadduh ia u pulit CRPF uba la iap ha ka jinghiar thma ha ki lehnoh Pakistan ha ka sngi palei jong ka taiew. Ha katei ka jingleit sngewlem u Rajnath u la snohkti lang bad ki shipai ban bah ia ka synduk iap jong uwei na ki shipai uba la khlad noh.
Ia ka metiap jong ki 40 ngut ki CRPF la rah noh sha Delhi mynta ka sngi. Kitei ki dei kiba la iap ha ka jingshah hiar thma ha u riew kheinduh uba la tur da ka kali SUV ryngkat ki bomb kiba haduh 350 kilo sha ka kali ba shong ki CRPF ha Pulwana, Jammu and Kashmir. Ka kynhun lehnoh na Pakistan ka Jaish-e-Mohammad (JeM) ka la kam ba dei ma ka kaba la leh ia kane ka kam.
Mynta ka sngi ka la don ka jingialang kyrkieh kaba la khot da u myntri rangbah duh ka Ri u Narendra Modi kaba la donlang ki ophisar rangbah ryngkat ki myntri sorkar bad hadien ba la wai katei ka jingialang u Modi u la pynrem jur ia kiba donkti ban hiar thma ia ki CRPF bad u la byrngem ba ka India kan siew kylliang ia ki ha ka rukom kaba dei. U myntri ka tnad pla tyngka ka sorkar u Arun Jaitley u la ong ba ka India kan pyntikna ba ka Pakistan kan sah marwei noh namar katei ka kam. Katba ka US pat ka la maham ia ka Pakistan ba ka dei ban pynkut noh mardor ia ka jingai jaka rieh ia ki lehnoh.
U Rajnath Singh uba dang bah ia ka synduk iap jong uwei na ki CRPF uba la khlad noh ha ka jingshah hiar thma ha ki lehnoh Pakistan.
Phi don ban ong eiei?