Bad ka long MLA bad ka long nonghikai, ther ka kong Ampareen

Shillong:Katba ka jing ialap elekshon na bynta ka elekshon Lok Sabha ka dang sdang khluit ba thnem bha ,ka kyrtong jong ka National People’s Party (NPP), ka Dr M Ampareen Lyngdoh, ka la buh dak jingkylli ia ki katto katne ki nongmih khmat paidbah kiba ba dang bam armaloi bad kam pat ba kin shakri ia ki paidbah.

Haba kren ha ka jingialang paidbah ha Mawsynram ha ka sngi Nyngkong, ka Dr Ampareen ka la ai nuksa ialade, ha kaba ka la pyntip ba ka la iehnoh ia ka kam nonghikai hadien hynñiew bnai ba ka shah jied kum ka MLA ha u snem 2009.
Ka la pynpaw ruh ia ka jing sngewkhia bad bynñiaw ba ki don pat ki MLA kiba dang bat ia ka kam nonghikai, wat hadien ba ki la shah jied kum u nongthaw Aiñ la palat shi snem, ha kaba dei ban tip shai mano kita ki briew.
Ka jingkylli mynta ka mih, ki paidbah ki dei ban wad mano u ta u MLA uba dang bat ia kam nonghikai….ki paidbah ki dei ban wad, kiei ki kyrtong kiba bat ar kam,la ong ka kong Ampareen ha ka jingkren jong ka ha Mawsynram.

Halor ki jingkynthoh jong ki katto katne ba ka dei ka briew kaba thrang bad kwah bor, ka Dr Lyngdoh ka la ong ba lada ka shah jied kum ka MP, kan sa iehnoh ia ka kam kum ka MLA ha kaba ka la pynksan ia la ka jong ka nongrim kaba iapher bad kiwei pat ki kyrtong ialeh pyrshah bad kwah jingkylla.

Kane ka jingkynthoh jong ka kong Ampareen ka la paw beit kumba ka thmu beit ia ki ar ngut ki nongialam jong ka parti VPP, kata u MLA ka Voice of the People’s Party (VPP) na Mawlai, u Bah Brightstarwell Marbiang, u ba dang bteng ban bat ia ka kam nonghikai nalor ka kam MLA bad kumjuh ruh ia u kyrtong MP jong ka VPP, u Dr Ricky J Syngkon u ba dang bat ia ka kam nonghikai.