Ba wan trei khlem kot sla, pynher krad ka HYC Riwar Mihngi ïa ki bar jylla

Shillong: Ka seng Hynñiewtrep Youth’s Council (HYC) Riwar Mihngi Circle hapoh ka jingïalam u President ka seng u samla Donaldson Pyngrope bad u General Secratary u Samla Teibor Marbaniang, mynta ka sngi, ki la pynlong ka jinghiar jurip ban leit peit la ki nongtrei bar jylla ha kawei na ki par mawshun kaba don ha shnong Pongtung ki biang ne em ki kot ki sla.

Ha ka jingleit jurip ka seng ka la ïathuh ba baroh san ngut ki nongtrei bar jylla ha katei ka par mawshun ym don satia uwei ruh uba biang ki kot ki sla. Ka seng hadien ba ka la lap ïa kane ka la bthah ïa ki trai bad ki nongpyniaid ba ki dei ban phah biang noh ïa kitei ki bar jylla sha ka jaka ba ki wan bad hadien ka jingïakren na ka liang u trai par u la leit buh biang noh ïa kitei ki bar jylla ha Guwahati mynta hi ka sngi.

Na ka liang ka HYC Riwar Mihngi Circle ka maham jur ïa ki trai par bad ki contractor ba lada ki wan ïalam nongbylla bar jylla ki dei shuwa ban pynbiang ki kot ki sla kat kum ka jingdonkam ba la bthah da ka aiñ.