|
Shillong: Na ka jingwan rung ki bar jylla, ka seng Hynniewtrep Achik National Movement ka la thaw ia ka Anti Influx Operation Movement (AIOC).
 Ka AIOM kan sdang ban trei kam naduh ka 4 tarik u Jylliew 2019 ha kylleng ka Sor Shillong bad ruh ha ki ba bun ki bynta jong ka jylla, da kaba kan sdang ban khynra bad talasi ia ki mynder khamtam kito kiba wan na Bangladesh bad ki bym biang ki kot ki sla.
Kane ka long shi bynta ban khang lad ia ki mynder ba kin wan knieh jubor da ki buittuh jong ki ia ki bylla sngi bad ki kamai kajih jong ki samla ki hynniewtrep.
Haba kren ha kane ka jingialang u President ka HANM u Lambok Kharbani u la ong, “Labun bah ki bar jylla ym tang ha sor wat ha khap sor ruh kumjuh kawei ka daw ka long ba ka sorkar kam don ia ka ain ka ba khlain bad kam pat lah ban pyntrei kami a ka ILP. Ban shu sngap tang ia ka sorkar kan wan rah ia ka jing ma ia ka jait bynriew jong ngi.”
U President ka HANM u la ban jur ruh ba ka daw ba la jia kumne kadei jing bym kitkhlieh jong ki Syiem bad ki Dorbar shnong.
“Kat kum ka jing lap jong ngi naduh u snem 1986 – 1987 la shem ba ki mynder ri ki la ioh ban bsuh haki shnong ki thaw jong ka bri u Hynniewtrep ka dei lyngba ki Syiem bad ki Dorbar shnong,” la ong u Lambok Kharbani ha ka ba u la bynrap ba ka seng kan peitngor bha ia ki Dorbarshnong kumjuh ruh ia ki Syiem khnang ba kin ymlah ban ai NOC kulmar ia ki bar jylla bad wat ia ki Company ruh.´
Ki dkhot jong ka AIOM ki kynthup ia U Bah Bobby Basaiawmoit, Chairman, U J Sangma, Vice Chairman, U Bah Nelson Kharbani, Secretary, Bah Goldenstar Khongwar, Asst Secretary. La jied ruh ia ki hynriew ngut ki Organising Secy Luwin Syiem,Andrew Shangpliang, Samborlang Tron, u Arwan Syiemlieh bad u Sainkupar Basaiawmoit bad la jied ruh ruh ia ki 15 ngut ki dkhot na Upper Shillong bad 15 ngut na HANM Mawlai ban long kum ki Volunteer.
|
Phi don ban ong eiei?