Ba wan rung bad kit tiar u Registrar da ka trok, khang tala ka NEHUSU bad KSU ia ka ophis u Registrar

Shillong:Ka seng NEHUSU bad KSU NEHU Unit ki la khang tala noh ia ka ophis u Registrar hadien ba ki la ioh jingtip ba u la wan rung jir jir jar jar mynhynnin ka sngi da kaba wanrah da ka trok ban kit tiar ki tar ha ka por ba kynjah briew.

Haba kren sha ki nongthoh khubor, u samla Sandy Sohtun ka NEHUSU u la pyntip ba kine ki ar tylli ki seng samla pule, ki la shim ia ka rai hadien ba la shong jingialang ban leit khang tala syndon ia ka ophis u Registrar u Rtd Colonial Omkar Singh.
“Une u Registrar ka NEHU ula wan iuhkjat ha kine ki sngi ruh ha katei ka skulbah khlem kano kano ka jingpyntip bad mynta ka sngi, ruh ula wan rung da ka trok syndon khlem ioh jingbit”, la ong u samla Sandy.

Ula bynrap, “Hadien ba la ioh jingtip, ngi la leit khang tala noh syndon ophis ka Administration. Hadien ba ki la khang tala, ngi la leit sha jaka sah jong u bad ki la lap ba u dang lum ia ki tiar ki tar bad ki la bthah ia u ba u dei ban mih noh bad lada u donkam ban lum ia ki tiar ki tar, u dei ban phah da kiwei hynrei kim shah ba un wan iuhkjat dalade”.
Ki la maham ia u ba kim ym shah ia u ban wan rung sha NEHU da lei lei ruh.

U la ong ba ka seng ki samla pule ka la thoh ia ka shithi sha ka tnad pule puthi ka sorkar India ban dawa ban pynsted ban ai ia ka jubab. Kila pynkhreh ruh ban kynduh ia u myntri rangbah ka jylla ba un tuklar ban pynsted ban ioh ia ka jubab na ka sorkar pdeng halor ka kynrum kynram ha NEHU.