Shillong:Ka jingtyrkhong ka pung Umiam, ka dei ka jingkordit ia ka tnad pynmih bording ka jylla ka Meghalaya Energy Corporation Limited (MeECL), bad kumjuh ia ka sorkar, kaba hap ban pynlip ding jan 10 kynta ha ka shi sngi. Pynban ha kawei ka liang, kane ka long ka jingkyrkhu ia ka tnad Meghalaya Tourism Development Corporation (MTDC) namar ba ka la ioh kamai bun na ki nongwankai ban peitkai ia ka jingraikhoh ka pung Umiam bad ka jingpaw ka surok rim ka la khring kham bun ia ki nongwankai ban ia kaba ju long mynshwa.
Ka jingduna slap ka la pynlong ia ka pung Umiam kaba bsa bording bun tam ha ka jylla, ba kan ring sdot haduh ba la paw lun ki lum.
Ha ka jingiakren bad u nongniah lieng jong ka MTDC, u bah Leaderkus Nongsiej u la iathuh ba ha kine ki sngi, ka jingwan ki briew ka la kiew bha naduh ba la mih ka surok rim kaba ju tap ka um ba rben ha kine ki bnai ba la dep. Da ki spah man ka sngi, ki briew kim dei eh ba ki wan ban shong lieng ban peit ia ka pung Umiam, hynrei kiba bun khamtam ki Khasi ki wan khnang ban wan peitkai ia ka jingpaw ka surok rim, kaba ju iaid kali ha ki hynriew phew snem mynshwa ha ka por bym pat don ka dam ka pung Umiam.
“Mynta bun bha kiba wan peitkai ia ka surok rim”, la ong u bah Leaderkus, bad u la bynrap, “Ha kiwei ki snem ha kum kine ki bnai, la kiew bha ka pung na ka jingheh slap katba mynta u snem ka rit”.
U la iathuh ba ha ka shi sngi, kumba 50-60 sien ka jingpyniaid ia ki lieng khamtam ha ka por ba rang bad ki duna ha ka por slap bad, kiba bun ki dei kiba wan nabar. Ki don kumba 4 tylli ki boat ne ki lieng kiba dang treikam katba kiwei ki la sniew lut kynthup ba pyniaid bad shisien shong ka long 5 minit bad kawei kaba heh ka kit 11 ngut katba kiba kham rit ki kit 3 ngut. Baroh ki don 7 ngut ki nongniah lieng kiba bunkam naduh dang step haduh janmiet.
Ka jinghap slap ha kine ki ar sngi, ka pung Umiam kala kham kiew khyndiat hynrei kam pat lah ban ai jingkyrmen ban pynmih bording bun bad ka donkam ban ioh slap bun ban kiew ka jingjylliew ka pung.
Phi don ban ong eiei?