Ba tynrah briew, u khun, iap 2; shah kem u kpa, ba u ailad ba un niah kali ba dang rit rta bad sa ka dih buaid

Ki pulit jong ka nongbah Pune ha Maharashtra, ki dang ap ia ka rai, na ka bynta ban shim bishar ia u samla rit, uba dang 17 snem ka rta, uba la tynrah da ka kali remdor jongu, ka Porsche, ia arngut ki samla, kiba shong da ka thuk thuk bad ki dei ki software engineer. Utei u samla rit, u don mynta ha ka jaka shah sumar ia ki khynnah, lane ka Children’s Observation Centre, na ka bynta 15 sngi, kaba long, haduh ka 5tarik Jylliew 2024, hadien ba ka kashari jong ki khynnah rit, ka kyntait ia ka jingpan jamin jong utei u samla rit, ha ka sngi balang.

Ki pulit jong ka Pune, ki kwah ban tian bishar ia utei u samla rit, ha ka kyrdan kum u rangbah, halor katei ka jingleit tynrah jongu ia ki arngut ki samla, kiba la khlad noh, ha kaba U Koshta, u la khlad ha shen, katba ka paralok jongu, ka Awadhiya, ka la iap ha shen.
Ia utei u samla, la pynngat sa kawei ka kyndon thymmai, kaba dei ka section 185 bad kata ka long, ba u niah kali, ha ka jingdih buaid kyiad.

Ha kawei pat ka khubor, la iathuh ba ka kashari, ka la rai ban phah tohkit ia U Vishal Agarwal, uba don 50 snem ka rta, uba dei u kpa jong utei u samla rit bad nangta sa arngut ki nongtrei jong ka Hotel Black Club, kiba kyrteng U Nitesh Shevani bad u Jayesh Gavkar, ha kaba ki pulit, kin tohkit ia ki, haduh ka 24tarik Jymmang. Kitei ki arngut ki nongtrei jong katei ka bar, ki shah kem, namar ba ki leit ai kyiad, ia utei u khynnah, uba dang rit ka rta. Ka section 75 jong ka Juvenile Justice Act, ka kren halor ka jinglehsting ia u samla rit lane kaba ailad ia ki kam kiba ktah ia ka jingmut jingpyrkhat bad ia ka bor met bor phad jongu ruh, katba ka section 77, ka dei kaba ailad ia u samla rit, ba un dih kyiad ne dih droks.

Ka jingkynnoh jong ki pulit, ia U Vishal Agarwal, uba dei u nongkhaii iing, ka long ba kumno u leit ai ia ka kali remdor, ba un niah u khun jongu, haba um don tang ka laisen niah kali ruh bad kaba long ka jingma kaba khraw ia ka jingim jongu bad nangta, haba ula tip, ba ula buaid kyiad ruh bad nangta, ba u niah ruh ia ka kali, ka bym don number plate.