Nongpoh: Ki Pulit Central Reserve Police Force (CRPF), kiba la wanrah da ki bor sorkar na Assam ha Umlaper, kaba hap hapoh ka Raid Nongtung ha Ri Bhoi, ki la mih noh na katei ka jaka, kata hadien ba ki heh Pulit na Ri Bhoi, ki la leit ban iakren bad tuklar ruh halor ki nongrim, kaba ki pynpaw ba ka jingdon kitei ki Pulit CRPF ha katei ka shnong, ka pyntieng pynban ia ki paidbah kiba sah ha katei ka thain.
Lah ruh ban kdew hangne, ba ki bor sorkar na Assam, ki la pynpaw ba ka jingleit ban buh ia kitei CRPF ha katei ka shnong, ka long ban peit ia ka shongsuk shongsain ha ka por ba rakhe ia ka Sngi Laitluid ka Ri India, hynrei wat haba la kut ka rakhe ia ka Sngi Laitluid, kitei ki CRPF kim shym la khih satia na katei ka jaka bad kaba la pynlong ia ki briew na Meghalaya, ba kin pyrshah jur halor katei ka jingdon ki CRPF ha katei ka shnong.
Haba la iohi ba la mih ka jingpyrshah na Meghalaya halor katei ka jingdon ki CRPF ha Umlaper, ki heh Pulit na Ri Bhoi, ki la khot iakren ia ki heh Pulit na Assam, kiba dei na Hamren District, ha kaba Pulit Ri Bhoi, ki la kren sha kitei ki heh Pulit Assam, ba lada ka long ha kano kano ka rukom, ym dei ban don ki Pulit CRPF hapoh katei ka shnong, da kaba pynpaw ba ki paidbah kiba sah ha katei ka thain kim donkam ia kita ki CRPF, hynrei tang da ki Pulit ruh la biang ban peit ia ka shongsuk shongsain ha kitei ki shnong khappud.
Hadien katei ka jingleit iakren ki heh Pulit na Ri Bhoi, hynnin ka sngi ki Pulit Assam, ki la pynbna ba kitei ki CRPF kiba don shipor ha Umlaper, ki la rai ban mih noh na katei ka jaka.
Phi don ban ong eiei?