Ba torti ka surok na Zero Point Damsite sha Madan Sohmylleng; dawa ka HITO, ban nym pyllait ïa ka pisa sha u contractor

Shillong:Ka Seng Hynniewtrep integrated Territorial Organization (HITO) hapoh ka jingïalam u Bah Ban Kharnaior President bad u Bah Keny Nongrum Secretary, ki la leit ban jurip ïa ka surok na ka scheme PMGSY kaba la mang kumba 1.54 klur, na bynta 3 KM na Zero Point Damside sha Madan Sohmylleng.

Ha kane ka jingjurip ka seng ka la lap ba kane ka surok kaba dang shu dep pyntrei dang ha ki katno katne bnai ba la dep, ka la da jot ha kiba bun bynta. Ka seng ka la lap ruh ba ka don ruh ka jing khlong ka um napoh ka surok na ka daw ka jingtrei torti kaba lah ban wanrah ruh ïa ka jingjia ba sngewsih.

Na ka liang ka seng hadien ba ka la dep jurip ka la lap ba wat ïa ki kyndon ba la buh ban siang ïa kane ka surok la ïaid lait da u Contractor bad ba u contractor um tei syndon ruh wat ïa ki muri kiba la mang khnang ba ka um kan ïoh tuid.

Ka seng hadien kane ka jingjurip ka phah da ka shithi sha u Chief Engineer PWD ban dawa na u ban ym pynlait lut ïa ka pisa sha u Contractor ba pyntrei ïa kane ka surok bad ban ai jingpynshitom ruh ïa kane ka jingtrei torti jong une u contractor.