Shillong:Hapdeng ka jingialehkai phutbol jong ki ar tylli ki Team kata ka Mawlai Sports Club bad ka Ryntih Sports Club, kaba la pynshongshit ia baroh artylli ki nongkyrshan, ha kaba la pynlong ha ka madan kaba lai ha Polo, ha ka sngi Palei ka 14 tarik u Naitung 2022.
Na ka jingdap smam, ka rynsan peitkai bad ka la don ka jing ia kynhoi ia risa bad katei ka la pynlong ia ka rynsan, ba kan khyllem syndon. Ha katei ka jingjia, la iathuh ba arngut ki rangbah briew, ki la mynsaw.
Lah ban kdew ba katei ka jing khyllem jong ka rynsan peit kai, ka dei ba ki siej kiba napoh ba la shan ia katei ka rynsan ki la kdiah lut, namar ka jing khapngiah jong u paitbah bad sa ka jing rynsied ha katei ka rynsan, hadien ba ka Mawlai Sports Club ka la thep shi kol ia ka Ryntih Sports Club.
La ioh jingtip na ki nong pyniaid jong ka tei ka jingialeh kai phutbol ka Shillong Spots Association, ki la shna ia ka rynsan, kaba ngiam, tang hapoh 200 ngut ki nongpeit kai; hynrei kim poi pyrkhat ba kata ka 200 ngut ba ki thmu, kin poi palat hajar ki paitbah mynta ka sngi. Ym tang katta, la la iohi ruh ba la don ka jingdheng kali kaba shyrkhei ha ka Thain Polo bad ki jaka ba marjan ba ki paitbah ki shu syrtap naduh shaneng ki surok ban leit sha Golflink.
Ha katei ka jingiakhun pyrshah jong ki artylli ki team ha ka lympung OC blue Shillong Premier League 2021-22 la pynbam kput ka Mawlai Sports da kaba pynkhih jar haduh 5-0 ia ka Ryntih Sports Club.
Phi don ban ong eiei?