Ba thurmur ka rukom pynbeit pud, byrngem ki paidbah ban ujor sha Supreme Court pyrshah ia ka sorkar jylla

Nongpoh: Haba la bitar halor ka jingpynbeit pud ba thurmur hapdeng ka Meghalaya bad Assam, khlem ka jingmynjur ne mon da ki paidbah bad khamtam eh ba ka sorkar Meghalaya ka la mynjur ban soi ia ka Memorandum of Understanding (MoU) bad ka sorkar Assam, ki nongialam shnong ka Maikhuli, kaba dei kawei na ki shnong kaba ki paidbah ki pyrshah eh ia ka jingiapynbeit pud, namar bun ki jaka ki la shah pynhap sha Assam, kumta ki la shim ia ka rai ban ujor sha ka Supreme Court, khnang ba katei ka iingbishar ba hehduh hapoh ka ri ba kan ai ia ki ia ka jingbishar kaba hok.

Ki nongialam shnong ha ryngkat ki paidbah na katei ka shnong, ki la pynpaw ba kumba ka long ha kane ka jingpynbeit pud kaba mynta, la lap bad shem ba bun ki jaka hapoh katei ka shnong, ki la shah pynhap lut sha Assam, hynrei ki paidbah pat ki kwah ban don ha Meghalaya, kumta haba ki la shah pynhap sha kano kano ka jaka kaba kim mon, kam banse ia ki ba kin leit ujor noh sha ka Iingbishar, khnang ba kin ioh ia kaei kaba ki kwah.

Ka jingangnud da ki paidbah kiba shong ba sah ha katei ka shnong, ka long ba ki jaka jong ki ba kin don ha Meghalaya, namar naduh ki por ba mynshwa ki la heh la san ha ki jaka kiba hap ha Meghalaya, hynrei mynta kyndit kyndit hadien ka jingiapynbeit pud, la lap ba bun ki jaka jong ki riew shimet bad jaka shnong, ki la shah pynhap jubor sha Assam, wat hapdeng ka jingpyrshah kaba jur eh na ki paidbah.