Ba thurmur ka result nonghikai, ai por 10 sngi ia ka NIOS

Shillong, 28 Nailur:
Ki nonghikai kiba ialeh ia ka eksamin na ka NIOS bad DERT ki la buh 10 sngi ba ki bor ba dei peit kin pynbeit ia ka jingbakla bad lada kim leh, kin sa kiew sha iing kashari ban wad ia ka hok.
Kine ki nonghikai ki la dawa ba dei ban pynbeit ia ka result kaba la shu leh thurmur na ka bynta ka eksamin ba ki ialeh ia ka Diploma in Elementary Education (DELED) jong u snem 2013-14.
Ia kane ka rai jongki, la shim mynta ka sngi hadien ba ki bor ba dei jong ka NIOS bad ka DERT ki la pan por ba 10 sngi ban pynbeit ia kane ka kam.
Mynta ka sngi, kine ki nonghikai ki la pynlong ia ka jingrah lama iong da kaba iaid sha Laitumkrah-Nongrimmaw ba don ka ophis ka DERT ban pynpaw pyrshah ia kane ka kam thurmur.
Ki nongialeh eksamin ia ka Diploma of Elementary Education (DED) ki la kynnoh ba ka jingpynbna result ka National Institute of Open Schooling (NIOS) ka long kaba lymmuh bad lymbrum lumbram kaba khlem beit satia namar ba don kiba wan ruh, la thoh pep bad don kiba ioh marak palat ia kaba buh ruh.
Haba kren mynta ka sngi, sha ki nongthoh khubor kine kiba ialeh ia kane ka eksamin ki la ong ba ka jingai ia ka internal mark ruh khlem kynthup lang ha ka mark sheet.
Kiba ialeh ia kane ka eksamin ha u snem 2013-2014 ki don 4800 ngut ki nonghikai ba la pynbna da ka National Institute of Open Schooling (NIOS) ha ka 9 tarik Nailur.
Kine ki nonghikai ki la ong ba ki la lap ia kane ka jingdkoh la lap lyngba ka jingtip da ka RTI ba la pan jingtip da ka Meghalaya SSA Schools Association (MSSASA), ka jingpynmih ka la slem bha namar ba ka dei ban mih ha u bnai Nohprah mynshem snem hynrei la pynmih ha u bnai Nailur mynta u snem.
U Bah JJ Lyngdoh uwei na kiba kynduh ia kane ka jingeh, ula ong ba ki sngew lyngngoh ban iohi ba ka NIOS ka la pynmih ia ka result kaba lymmuh kata ruh hadien ba la slem haduh khyndai bnai. Kane ka jingleh ka long ka jingialehkai ia ki nonghikai, u la ong.
Ki la kynthah ruh ia ka sorkar kaba khlem leh ban tuklar ia kane ka kam haba ki nonghikai ba ialeh ia ka eksam ki iakynduh jingeh, khamtam ba ka dei ka prokram ba phah da ka sorkar.
Ki don 82 tylli ki jaka pule hapoh ka Directorate of Educational Research & Training (DERT). Ka jingialeh ia kane ka DED ka long ban pynlong ia ki nonghikai ban pyntbit ha ka rukom hikai.
Kine ki nonghikai ba kynduh ia kane ka jingeh, ki la byrthen wat ban pynlong da ka jingiakhih ban pynpeit mat syndon ia ki bor ba leh ia kane ka kam. Ki la dawa ba dei ban pynbeit biang ia ka result, ban korek bad ban pynmih biang ia ka.