Nongpoh: Shi bynta ban pynpaw ia ka jingpyrshah kaba jur eh halor ka jingthmu ka Assam ban pynpoi bording ha ki katto katne tylli ki shnong khappud ha Raid Nongtung bad kaba la ju tip paidbah kum ka Block-II, mynta ka sngi ki nongialam ka KSU Eastern Border ha ryngkat ki nongialam ka Synjuk ki Rangbah Shnong Raid Nongtung (Block II), ki la leit ban kynduh ia u Arpit Upadhyaya, Deputy Commissioner ka Ri Bhoi, ha ryngkat ka jingthoh ban pynpaw ba da lei lei, kim ailad ia katei ka jingthmu ka Assam.
Ha katei ka jingleit ban kynduh DC, kitei ki nongialam kiba kynthup ia u Samla Banjop Maring, President ka KSU Eastern Border, nangta u Bah B. Sohtun, President ka Synjuk lem bad kiwei, ki la pynpaw hakhmat u DC, ba ki pyrshah eh ia katei ka jingwan leh donbor da ka sorkar Assam, kaba la thmu ban pynpoi bording jubor ha kitei ki shnong, khlem da kynjoh ktien ia ki nongialam shnong. Ki la pynpaw ruh hakhmat u DC, da kaba ong ba ki briew sorkar Assam, ki la sdang ban pynpoi bording sha ki shnong khappud katei ka thain, da kaba sdang ban ban tan sainar bad pynpoi ia ki Post Ilektrik.
Nalor ba ki la pynpaw hakhmat u DC halor katei ka jingthmu leh donbor ka Assam, kitei ki nongialam ka KSU bad Synjuk Rangbah shnong, ki la pynpaw ruh ia ka jingbitar ia ka Assam, namar ha man ba ka sorkar Meghalaya ka thmu ban pynpoi ia ki skim pynroi sha kitei ki shnong khappud, hynrei ki briew na ka sorkar Assam ki ju wan ban pynthut bad kim ailad ba kitei ki shnong kin ioh ia ki skim pynroi na ka sorkar Meghalaya.
Kitei ki nongialam KSU bad Synjuk Rangbah shnong, haba kren sha ki lad pathai khubor, ki la pynpaw ba kim ailad satia ba ka Assam kan ioh ban pynurlong ia katei ka jingthmu pynpoi bording ha kitei ki shnong khappud bad lada ki leh jubor, kaba mut ba na ka liang jong ki ruh kin pyni da ka bor.
Halor katei ka jingleit kynduh jong ki ia u DC, ki la iathuh ba u DC u la ai ka jingkular ba un sa shimkhia ha kaba kren sha ki heh ka Assam Assam, na ka bynta ban pynsangeh syndon ia katei ka jingthmu pynpoi bording ka Assam ha katei ka thain.
Phi don ban ong eiei?