Ba thmu pyni bor, pynher krad ka KSU ia ki spah ngut ki bar jylla kiba trei ha kawei ka karkhana ha Umiam

Nongpoh: Ki dkhot ka KSU ki la leit ban pynher krad ia ki spah ngut ki nongtrei bar jylla, kiba trei ha katei ka karkhana otdieng kaba la tip kum ka Riangdo Veeneer (P) Ltd, kaba don ha Umiam, kata hadien ba ki la tip ba kitei ki briew na shabar jylla, ki la sdang ban pyni bor, wat haba ki la tip ba ki la shu wan bylla khlem da don ia ki kot ki sla kiba biang.

Haba iadei bad ka jingjia kaba mynta ka sngi, kaba la pynlong ia ka jingshah beh ia kitei ki spah ngut ki nongbylla, ia kaba la thep ha ki 6 tylli ki trok ban pynpoi ia ki sha Assam, ka la jia hadien ba ki nongtrei na ki karkhana bapher bapher, kiba don ha Umiam, ki la pynlong ia ka jingiakhih ban pyrshah halor ka jingkynnoh ba ki la shah ktah kti ha ki briew ki bym lah ban ithuh bad kaba la jia hynnin ka sngi hapoh katei ka Karkhana ha ka por ba ki dkhot ka KSU, ki la leit ban khynra ia ki kot ki sla jong ki briew nabar kiba trei ha katei ka karkhana.

Haba pyntip sha ki lad pathaikhubor, kitei ki nongtrei bar jylla, ki la iathuh ba ki la shah shoh beain hynnin ka sngi bad don naki kiba la poi sha ki jaka sumar. Nalorkata ki la pynpaw ruh ba kim shanniah shuh ha ki pulit, namar ha katei ka por ba ki shah shoh, ki Pulit kim iarap ne iada ia ki, kaba la pynlong ia ki ba kim banse ban iakhih, na ka bynta ban kyntu ia ka sorkar ba ka dei ban shimkhia halor katei ka jingshah ktah kti jong ki. Ki la pynpaw ruh ba katei ka jingshah shoh jong ki, kam banse ia ki ba kin sa leh pyrshang khnang ban pynpei skhor ia ka sorkar bad kiba la ong ruh ba lada ki shah beh na katei ka jaka kaba ki trei, kin sa shim da kiwei ki sienjam bad kata ka khang syndon ia ka surokbah na Assam sha Meghalaya. Tang mar ia tip halor katei ka jingjia ba pyni bor kitei ki nongtrei bar jylla, kiba la leh pyrshah wat haba kim biang ia ki kot ki sla, ki dkhot ka KSU ki la bitar eh bad kiba la thmu ban leit sha katei ka jaka ba kitei ki bar jylla, ki la thmu pynlong ia katei ka jingiakhih, hynrei ha kaba kum katei ka por ki la shah khang lynti noh ha ki bor pyniaid Distrik ka Ri Bhoi.

Ha ka jingiakren hapdeng ki nongialam ka KSU lem bad ki bor pyniaid Distrik ka Ri Bhoi, la ailad ia ki nongialam ka KSU ba kin leit sha katei ka jaka kaba kitei ki nongtrei bar jylla, ki pynlong ia ka jingiakhih bad ha kaba kum katei ka por, ki nongialam ka KSU ki la maham ia kitei ki nongtrei bym biang ia ki kot ki sla bad kiba trei ha katei ka Karkhana, ba ki dei ban mih noh shisyndon na katei ka jaka.

Haba kren sha ki lad pathaikhubor, ki nongialam ka KSU, ki la ong ba ka nongrim kaba la pynlong ia ki dkhot ka seng ba kin leit khynra ha katei ka Karkhana, ka dei hadien ba ki la ioh jingtip ba ki la don shibun ki briew kiba la wan brain ban trei ha katei ka Karkhana, hynrei haba ki dkhot ka seng ki la leit ban khynra, kitei ki bar jylla ki la sdang pynban ban pharep da kumne kumtai bad kaba pynpaw shai ba ki la sdang ban pyni bor kylla.

Haba shim kyllum ia ka jingkren ki nongialam ka KSU lem bad ki nongialam shnong Umiam, ki la ong ba katei ka jingjia baroh, ka la jia tang namar ba la lehheh palat da u nongpyniaid jong katei ka Karkhana, uba la leit pynshit ia baroh ki nongtrei ha kitei karkhana kiba don ha Umiam ba kin pynlong ia katei ka jingiakhih.

Ka jingkren ki KSU bad dorbar shnong Umiam, ki la pynpaw ba u trai jong katei ka Karkhana, u dei uba ju mlien ban leh pyrshah bad u bym ju treh ban iatreilang bad ki bor shnong.