Shillong: Halor ka jing bna khubor ba ka sorkar ka thmu ban pynkynriah kam ia ki katto katne ki ophisar ha ka kyrdan Range Officer, ba la kynthup ruh ia uwei u ophisar na ka thain Western Ribhoi, u bah Enias Rani, batrei kum u Range Officer jong ka Soil and Water Conservation ha Patharkhmah.
Mynta ka sngi ka seng ki Rangbah shnong bad ki riew rangbah jong ka Western Ribhoi hapoh ka lama ‘Western Ribhoi Dorbar and Social Welfare Organisation’ ba la soi da ki 70 ngut ki riew rangbah lem bad ki nongialam jongki seng bhalang ryngkat bad ki Sordar Shnong jong ki 23 tylli ki shnong , ki la leit ban ia kynduh bad buh dorkhas ha ka miej jong u bah Sniawbhalang Dhar U Myntri ba dei peit iaka tnad Soil bad kiwei ha kamra jong u bala ialam da u Bah Lesstar Nongphlang President bad u bah Sranly Wahlang Secretary ka seng ban pynpaw iaka jing bymsngew iahap lada ka don shisha ka jingthmu ban pynkynriah kam ia utei u ophisar,nalor ba u dei u trai shnong jong ka thain,u dei ruh u briew uba trei hok bad shim khia iaki kam ban shakri kum u ophisar iaki paitbah ka dong ka thain.
Ki la dawa na u Myntri ba un tuklar lem ban pynneh ia utei u ophisar ha katei ka juh ka jaka, khamtam ba udei u briew jong ka thain bad ba u dang shu wan trei dang tang kumba shi snem tam mynta.
Ki tei ki nongialam, haba iakren mynta ka sngi bad katto katne ki nongthoh khubor, ki la iathuh ba kadaw ba ki la wan iakynduh ka long namar ba hadien ka jing bna ba utei u shakri sorkar na ka thain u lah ban shah pynkynriah kam,ki ba bun ki paitbah ka thain ki pynpaw ia ka jing sngew duhnong bad bynniaw namar ki suk ban leit iakynduh bad ban iakren iaki kam baroh na katei ka ophis namar ki ong ba u long u briew u kloi ban iarap.
Ki la pynpaw shuh shuh, “Imat dei ka jingdon ki riew khwan myntoi shimet,kiba kwah ban pynkynriah kam ia u briew u ba treibha,haba mynshwa jong u lei,ki ophisar kiwan tang tyngkhat lanore,katba une u bah Enias Rani u shong trei beit baroh shi taiew bad ki paitbah ki sngew kmen ia u,” bad ki la bynrap ruh bad ong, “Lada ka sorkar kan iaid beit ia ka jingthmu kumba la bna ban pynkynriah ia u(Enias Rani),ngin pynlong ki jingiakhih na ka liang ki paitbah jongki shnong jong ka thain.”
Haba jubab iaka jingkylli,kitei ki nongialam, ki la ong ba u Myntri u la jubab da kaba ong ba un sa ia syllok bad u MLA ka Jirang Constituency halor katei ka kam.
Ki la iathuh ruh ba ki la iakynduh ruh ia Director ka tnad Soil, ha kaba na ka liang jong u, u la ong ba um pat idonkam ban pynkynriah kam ia utei u ophisar.
Kumjuh, ki la iathuh ba kila leit ai ruh iaka dorkhas ha u MLA bah Sosthenes Sohtun,ha kaba u MLA u la ong ba un sa iakren bad u Myntri badei khmih ia ka tnad Soil.
Phi don ban ong eiei?