Ba ther kynsan u lapbah, shlei ka Jerobad, shah ktah ki kali rit bad dukan

Nongpoh: Ki la don shibun tylli ki kali bad ki dukan ha Jerobad, ki la shah ktah jur, na ka jingwan ther kynsan u lapbah, uba la neh kumba 2 kynta ei ei.

Ha katei ka jingwan ther u lapbah, ka la wanrah ia ka jingshlei um ha kiba bun bynta ka Jerobad bad kaba la pynlong syndon ia ki kali rit ba kim lah shuh ban iaid lyngba ka surokbah NH-37 bad nalor kata ka la don ruh ka jingshlei um ha ki dukan kiba don ha katei ka jaka.

Nalor ka jingshah ktah ia ki kali rit bad dukan, shipor ka la wanrah jingeh ruh ha ka leit ka wan ki paidbah, namar ki paidbah kim lah shuh ban iaid lyngba ki lynti iaid kjat bad ha surok, namar ba la shlei ka um.