Ba thaw ktem ki pulit Assam ha Saitsama, ujor ka JSM sha U DC Jowai

Shillong:Ka Jaintia Students Movement (JSM) Central Body, ka ujor sha U Deputy Commissioner, West Jaintia Hills District halor ka jingtrei ktem pulit jong ka Assam ha Pom Dkhar, Rtiang Sanphew, ki jaka kiba don ha Saitsama bad la ong da katei ka seng, ba katei ka dei ka jingthmu jong ka Assam, ban kurup ei ia ki jaka puta ha ki bynta jong ka West Jaintia Hills.
La ong shuh shuh ba ka jingtrei ia katei ka kut pulit, ka dei ha ka jingjngai kaba tang 20 Kilometre na Saitsama Outpost bad kaba lyngngoh, ka long ba ki pulit jong ka Saitsama, kim tip satia ia katei ka jingtam pud jong ka Assam.
Ka JSM, ka maham namarkata, ba lada ym sangeh shi syndon, kumta katei ka thain jong ka Saitsama, kan sa kylla long kum ka Langpih, ha kaba ka sorkar Jylla, kan hap ban bah khlieh. Ka JSM, ka dawa ban sangeh shi syndon ia ka jingtei ia kitei ki ktem pulit ha ka thain Saitsama bad ban khanglad ia ka jing skud jaka jongki ha Khatkasla bad ka seng ka maham, ba kan leh da kaba khor bha, lada ka sorkar Jylla kam leh eiei, ong ka kyrwoh na U bah Leningstar Rymbai, Presidetn ka JSM.