Ba tbit palat ban shad Poi Final u Steve Jyrwa ha ka Indian Best Dancer, pan jingkyrshan biang ki bahaiing

Shillong 01 Naiwieng: Ka kong Bibi Jyrwa ka ba dei ka kmie jong u samla Steve Jyrwa u ba iakop shad ha ka India Best Dancer Season-4 ka la iathuh, ba mynta u Steve ula shah jied bad rung shaduh ka grand final, ha ka ba ka la iathuh ruh, ba u Steve un sa shad ban iaknieh ia ka nam jop ha kane ka taiew ban wan, kata ka sngi saitjain bad sngi u Blei.

U Steve u dei u khun ba ar jong ka Kong Bibi Jyrwa u ba la don mynta la 17 snem ka rta bad ki ba shong ba sah ha Nongmynsong, dongkadiang katba ka trai shnong pat kadei na Jakrem West Khasi Hills District.

Ban tip khamshai ha ka ba iadei bad ka jinglong jingman jong u Steve mynta ka sngi thohdieng ka 01 tarik Naiwieng 2024,na ka liang u nongthoh khubor jong u Rupang u la leit sha ka jaka sah jong ka kmie, ki Meiieid bad ki bahaiing jong u Steve Jyrwa ka ba don ha Nongmynsong, dongkadiang ban iakren khambniah.

Haba ioh ban iakren bad i kong Bibi Jyrwa ka kmie jong u Steve ka la iathuh, ba mynta u Steve ula poi sha ka Grand Final bad ba un iakhun ban ioh rah ia ka nam jop ha kane ka taiew ban wan. Ha kane ka jingiakop rah ia ka nam Indian Best Dancer season-4 kidon haduh 6 ngut ki nongiakhun.

Ka kong Bibi Jyrwa ka la iathuh ruh, ba mynshwa ki paidbah ki ioh ban vote tang kumba 50 vote u wei u briew hynrei mynta ki paidbah ki lah ban vote haduh 500 vote u/ka Briew na ka Lenscard bad 500 vote na ka Sony Liv. Ki ba poi ha katei ka Final ki dei lut ki ba ja shatei hi najan Mumbai, katba na Northeast pat tang u Steve marwei.

“Namar ka jingkyrshan jong ki paidbah ba u Steve u sapoi shaduh ka Final, u Steve ula kwah ban wan sha Shillong hashwa ba un iakhun ia ka Final ban pan shuh shuh ka jingkyrshan, hynrei ki nongpyniaid jong ka Indian best dancer kim shah ba u Steve un wan sha Shillong tad haduh ban da dep beit ia ka Final bad u Steve ulah ban wan sha Shillong ynda ula dep shad ia ka Final”, iathuh la kong Bibi Jyrwa.

Shuh shuh ka kong Bibi Jyrwa ka la pynpaw ka jingsmgewnguh bad ai khublei ia ka sorkar jylla, ka ba la kyrshan ia u Steve naduh ka ba sdang bad ruh ia u bah Kitbor Thabah uba la ialam lynti naduh ka ba sdang kumno ban leh lane ban pyniaid ia ka kam shakhmat.

“Nyngkong ha kapor ba u Steve u poi sha Mumbai ngam khuslai ba un long kumno jia kumno, ha ka ba ka kong Bibi Jyrwa ka iathuh, ba ki paidbah ki iakren pynduh mynsiem namar ngi long ki ba duk, ba u Steve upoi ne em sha ka Final, hynrei khlem poi pyrkhad ba u Steve un poi shaduh ka Final ka ba la pynkyndit bad pynkmen ruh ia ngi ki bahaiing hasem”, la bynrap ka kong Bibi.

Kumta na ka liang ka kong Bibi Jyrwa bad ki Meiieid jong u Steve ki la pynpaw ka jingsngewkmen ban ioh sngew ba u Steve upoi sha ka Final.

Kumta ki la kyrpad ia baroh ki paidbah ka jylla Meghalaya bad ia ka Northeast hi baroh kawei, ba kin sngewbha ban ai lem ka kti kamon kti kadiang ia u Steve, da ka ba download ia u app Sonny liv bad ia u app Lenscard bad sa ai ia ka vote jongphi namar lada ki paidbah kin ai biang ka vote, u Steve un sa wanrah ia ka nam ka burom ym tang ia ka iing ka sem hynrei ia ka jylla baroh kawei.