Ba suba 666 ia U Aadhar, pan jingshai ka KSU na U DC

Nongstoin, 29 Naitung:
Ka Khasi Student Union, Nongstoin Circle, hapoh ka jingialam jong u samla Davisgoldfield Wanniang, myn ha ka sngi ba lang jong ka taiew ka la leit ban ia kynduh ia u DC ka WKHD, ha ryng kat ka jingthoh ba un ai ia ka jingpynshai kaba bniah halor u Adhar Number ha shwa ban pyntrei kam noh ha kane ka District.
U bah S. Kharlyng doh haba iakren bad ki nongthoh khubor u la ong ba ka jingmut jong u Adhar ka dei ka nongrim lane ka tynrai bad ka jingthmu ban pyntrei kam ia utei u Adhar ka long ban lum ia ki record jong ki briew lyngba ka bio metric data record, kaba don ha ki shimpriah kti bad ha ki khmat jong manla u wei pa u wei u briew bad kaba iapher na manla u wei pa u wei u briew; wat la ki iadei shi iing shi sem ruh.
Shuh shuh u la ong ruh ba lyngba ka jingdon jong katei ka bio metric data record lah ban tehlakam ia ka jingdon bun kyrteng ki briew ha ka electoral rool, lane kiba don kyrteng lai saw tylli u juh u briew, u la bynrap ruh ba kum kita ki briew ki don ka jingthmu aiu re sha lyndet bad da ka jingdon jong katei ka bio metric record lah ban pynshisha noh kum ia kita ki briew kiba don kyrteng palat ka shi jaka.
Na ka liang jong u samla Davisgoldfield u la ong ba kaba pynlong ia ka seng ban wan ia kynduh ia u DC ka long halor ka jingklumar jingmut jong ki paidbah ka thain khamtam kiba na nongkyndong ia u Adhar number ba ki tip beit ba u dei ta u number 666 namar ba kim ioh ia ka jingpynshai shaphang utei u Adhar.
 Kumta na ka liang jong ka KSU Nongstoin Circle, kala kyntu ia u DC ba u dei ban pynshai paidbah ia u tei u Adhar ha shwa ban pyntrei kam bad kila kyntu ruh ba la kumno kumno dei ban sdang pyntrei kam shwa napoh jong ka sor Nongstoin bad sa bud pat sa sha ki shnong kiba markhap.
Halor katei na ka liang jong u DC u la mynjur ia katei ka jingkyntu jong ka KSU bad u la kular ruh ba un sa pynlong ia ka jingpynshai paidbah halor katei ka bynta khnang ba ki paidbah kiba shai bad sngewthuh kham bha halor ka jingpyntrei kam ia u tei u Adhar number.