Ba sniew palat ki surok, ujor ka KSU sha Mawkyrwat

Shillong: Ka KSU Photjaud Rangthong Unit kaba dei kawei naki shnat treikam jongka KSU hapoh South West Khasi Hills District, hapoh ka jingialam jong u Samla Everwell Robin Thongni, uba dei U President jong ka KSU Photjaud Rangthong Unit ryngkat ka jingsynran lang ki dkhot jong kane ka Unit, myn hynnin ka sngi ki la ioh ban iakynduh ïa u Executive Engineer jong ka PWD Mawkyrwat Division, South West Khasi Hills District halor ki artylli ki mat.

Kawei ka dei haba iadei bad ki surok ne ki lynti syngkien hapoh ka dong ka thain ba ka surok Mawkyrwat – Mawmerang – Rangthong kaba hap hapoh ka jylli pyniaid kam (jurisdicton) jongka ophis Public Work Department (Rn) Mawkyrwat Division ka la sniew palat kumba ka long mynta. La lap ba ka rong ka la khoh lut bad kane ka la wanrah jingeh ia ki paitbah ba leit ba wan khamtam eh ia kiba dei ban iaid man ka sngi. Ka jingkhoh jong kane ka surok, kan nang sniew ar shah lai shah lada ym lah ban leheiei haka por kaba biang. Ka mat ka ba ar ka long ba kane ka surok Mawkyrwat -Mawmerang – Rangthong kum ka seng, la lap khamtam ha ki bynta shwa ban poi ha shnong Mawmerang ba kam biang iaki nala um bad la lap khamtam haka por slap ba ka um ka tuid napdeng surok namar kam don iaki nala ba biang bad kane ngi iohi kum ka seng ka kan nang pynsniew shuh ia shilynter ka surok lada ka ophis kam lah ban pynbiang ia ki nala um.

Kaba sngewkmen ka long ba na ka liang u Executive Engineer jong ka PWD Mawkyrwat Division mar sien ioh katei ka jingujor na ka liang ka seng u la ong ba na ka liang jong u ruh u la i sangsot ha kaba iadei bat kitei ki surok bad u la ong ruh ba un shimkhia shikatdei eh halor katei ka kam bad u la kular ruh ba un sa phah da ka jingthoh sha ki bor bahalor jong ka sorkar ba kan dup seisoh pura. Kawei kaba sngewtynnad ka long ba u la pynpaw ruh ba un ialeh katba lah ban pynïoh syndon da ka surok ka ba thymmai namar ban shu maramot tang katto katne por ka lah ban jot biang bad u la ong ruh ba da dei ba ioh surok thymmai ha ki bnai tlang, yn ïoh ban sdang ban pyntrei noh ia katei ka surok .