Ba sniew palat ka surok Sunapar – Rattacherra, jubor ka ia tynrah kali

Jowai, 28 Rymphang: Ka jingiatyng khuh bad hap kali ha ka surok bah NH-44 naduh Sunapur shaduh Malidor ka la jia khah khah tang na ka daw ba sniew palat u Surok.
Kane ka jingsniew palat utei u surok ka la wanrah ruh ka jingdheng kali man ka por ha katei ka thain kaba ktah ia ka iaid ka ieng jong ki nongleit nongwan, ymtang ia ki paidbah ha katei ka thain hynrei wat kiba kiwei pat ki jylla kiba kynthup ia kito kiba wan na Mizoram, Tripura, Silchar bad thain Barak Valley.
Ha ka 24 tarik dang step phyrngap, uwei u briew uba la tip kyrteng kum u Saurakh Chow dhury (47) u la khlad noh hashen hadien ba ka Night Supper ka la hap sha synrang ha Rattacherra. Ha katei ka jingjia bun ngut bha kiba la mynsaw bad la kit ia ki sha Khlieh riat CHC. Ha ka step phyrngap jong ka 25 tarik pat kawei ka trok kit Cement ka la ia tyngkhuh bad ka trok kit umphniang ha jan jing kieng Malidor, Ratta cherra ha katei ka jingjia ruh u nongniah jong ka trok kit cement kaba don ia u No. ML04C-0654 u la khlad noh ha shen.
Na ka liang ki paidbah nongshong shnong bad kumjuh ruh na ka liang ki nongialam ka Jaintia Youth Federation (JYF) ka la kyntu ia kibor ba dei peit ia une u surok ban shimkhia ban mara mot shwa ia katei ka bynta jong u surok uba la sniew haduh katta katta, na bynta ka bha ka miat ki paidbah kiba leit ba wan.