Ba sma khih sain pyrthei, thaw kynhun ki MDC KHADC

Shillong, 05 ’lyngkot:
Ka jingthaw ki MDC shimet ia ka kynhun United Democratic Alliance (UDA) ha KHADC, ka dei ka jingpyrshan jongki ban pynskhem para MDC shimet ban pynneh ia u Bah Pynshngain N Syiem kum u CEM, khnang ban iada ia ka jingkhih pynkhyllem ia ka Executive Committee ka PDF.
Haba twad jingmut na ki katto katne ngut ki MDC ka KHADC, ki la ong ba ka jingthaw jongki, ka bha eh namar ba kadon eiei ka jingsngew shon jingmut namar ba kam pat ju don ba ki MDC kin iathaw ia ka kynhun.
“Ka bha ban leh kumto, tangba kaba donkam, ka long ba ki dei ban don ka jingkitkhlieh. Hynrei kampher than, namar ba ki MDC shimet ki sah hi ki MDC shimet, ym lah ban leh eiei”, la ong uwei u MDC bym kwah ban pynpaw kyrteng.
Hynrei ha kawei ka liang, la ioh jingtip, ba ka la don ka jingsdang sma hapdeng ki para MDC ba ka EC mynta ka la don ha ka jingshah kdik hadien ba la mih ka result elekshon MDC shiteng samoi na ki 6 tylli ki konstitwensi.
Ki MDC ka liangsynshar mynta ki la don ka jingsngew wit bha ia ka rukom treikam jong u CEM bad ki katto katne ngut ki EM, kiba la lehmon ia ka kam, hynrei kam pat paw shabar namar ba ki dang pyrshang ban iapynbeit hapoh lada lah, hynrei lada ym lah, kan sa bthei syndon puk.
Ka Congress kaba don tang maka haka liangpyrshah, ka la pyrshang ban thaw lad ban pynkhyllem noh ia kane ka EC ba ialam da u CEM ba shah sospon ha ka party bad ki la pyrshang ban tyrwa ia ka jingiatreilang bad kiwei ki party.
Ha KHADC, mynta kam don shuh ka synshar party namar bun ki EM ki dei ki MDC shimetnalor u CEM u dei uba khlem ka party naduh ba la shah beh ha ka Congress.
“Ngin hap ban peit shwa ia ka jingtreikam jong kane ka EC katto katne por”, la ong biang une MDC.
Lah ban kdew ba ki MDC shimet ha KHADC ki la thaw ia ka kynhun hapoh ka jingialamu Bah Latiplang Kharkongor kum u chairman bad u Bah Banteidor Lyngdoh kum u secretary.
Ki MDC shimet ha KHADC ki kynthup ia ka Kong Grace M Kharpuri, Bah James Sylliang, Bah LG Nongsiej, Bah Morningstar Mawsor, Bah Hadrian Lyngdoh, Bah Albinus Lyngdoh, bad Bah Victor Rani.